Kem ki pulit 2 ngut ki snar nongkhaii drok, kurup palat 137 gram u heroin ha East Jaintia Hills

Syllad | The Rising MeghalayaAugust 27, 2025

Ka kynhun Anti-Narcotics Task Force (ANTF) ka East Jaintia Hills District ka la ioh ban kem noh ia arngut ki arngut ki snar nongkhaii drok na Umkiang bad Shillong bad ioh ban kurup shibun bah u drok heroin.

U Superintendent of Police, East Jaintia Hills, Vikash Kumar, IPS u la ong hadien ka jingioh jingtip kaba thikna ka kynhun ANTF ha ka miet 25 tarik Nailar ka la pynlong ka jingpynap shrip ha kawei ka jaka kaba hap hapoh Lumshnong PS ha kaba ki la ioh ban bat noh ia uwei u briew uba la tip kyrteng kum u Hajrat Umar 28 snem rta uba dei na Kaliachak, District Malda, West Bengal bad ioh kurup 11 tylli ki synduk sabon kiba don haduh 137.86 gram u heroin uba shongdor haduh kumba T.60 lak bad artylli ki mobile phone.

Hadien ka kynhun ka la ioh ban kem sa ia uwei pat u snar nongkhaii drok uba kyrteng u Phulchand Ali uba na Lum Survey, Shillong uba donkti ha ki kam khaii drok na kawei ka jylla sha kawei pat bad uba don bynta halor kane ka jingioh kurup drok.

Ki pulit ki la rejistar case hapoh Lumshnong Police Station hapoh ka NDPS Act bad ka jingtohkit mynta ka dang iaid shakhmat ban lapdien ia kiwei pat kiba donkti ha kane ka kam khaii drok.