Kem ki BSF ia u nong Bangladesh ba donkti ha ki kam khaii tuh bad pynrung tuh na khappud

Syllad | The Rising MeghalayaSeptember 1, 2024

Ki shipai Border Security Force (BSF) ka Meghalaya ha ryngkat ki bor pulit ka Jylla ki la ioh ban kem noh ia uwei u nong Bangladesh uba donkti ha ki kam khaii tuh bad ha ki kam pynrung tuh ia ki briew lyngba ki jaka khappud jong ka ri.

Ha ka jingkhynra kaba kyrpang ha ka 31 tarik u Nailar ba la dep, ki BSF ha ryngkat ka jingiatreilang bad ki bor pulit ka Jylla ki la ioh ban kem noh ia une u nong Bangladesh na ki thain khappud jong ka East Khasi Hills ia uba la tip kyrteng kum u Mohd Mijan Mia 49 snem rta uba dei na Sunamganj district, Bangladesh.

Ia une u briew ki BSF bad pulit ki la ioh ban kem noh na kawei ka jaka khlaw hajan khappud jong ka Ri, bad ha ka jingtohkit une u briew u la phla ba u la long kum u nongialam lynti na ka bynta ban pynrung beain ia ki nong Bangladesh shapoh India bad halor ka jingdonkti ha ki kam khaii beain.

Hadien kane la kem noh ia une u briew bad la aiti sha ki bor pulit hapoh Dangar police station na ka bynta ban bteng shuh shuh ia ka jingtohkit.