Kem ki BSF ia 4 ngut ki nong Bangladesh ba wan rung tuh sha ka Jylla

Syllad | The Rising MeghalayaMay 8, 2025

Ki shipai Border Security Force (BSF) ka Meghalaya ki la ioh ban kem noh ia saw ngut ki nong Bangladesh kiba thmu ban wan rungtuh sha u pud u sam jong ka ri na ki bynta khappud ka South West Garo Hills District.

Kane ka jingioh kem ia kine ki briew  ka la wan long hadien ba ki BSF ha ka 6 tarik Jymmang ki la ioh ia ka jingtip kaba thikna ha kaba iadei bad ka jingdon jong ki briew na Bangladesh kiba pyrshang ban wan rung tuh lyngba ki jaka khappud.

Ha kane ka jingkhynra ki BSF na ka 50th Battalion ki la sakhi ia ka leit ka wan jong ki katto katne ngut ki briew kaba pynsuba jur ha ki bynta khappud bad kaba la pynlong ba kin pynap shrip bad ioh ban kem noh ia sawngut ki nong Bangladesh kiba dei na ka thain Mymensingh, Gajipur bad Nogaon District ka Bangladesh.

Hadien la aiti noh ia kine ki briew shapoh Mahendraganj Police Station ha SWGH na ka bynta ban pynlong shuh shuh ia ka jingtohkit bad ban leh ia kaba donkam katkum ka ain.

Na ka liang ki shipai BSF ki dang iai bteng ban long kiba peitngor bad pynjur ia ka jingpahara ha ki jaka khappud ka India bad Bangladesh khnang ban pynthikna halor ki kam shongshngain jong ka ri bad ban tehlakam ia ki kam bymman lyngba ki jaka khappud.