Kaweh u CM ia ka lama Car Rally jong ka NCC ha ka jingrakhe dap 75 snem 

Syllad | The Rising MeghalayaNovember 6, 2023

U Myntri Rangbah ka Jylla Conrad K Sangma hynne ka sngi Nyngkong ula iashim bynta ha kaban kaweh ia ka lama na ka bynta ka jingpynlong ia ka ‘Car Rally’ jong ka National Cadet Corps (NCC) kum shibynta ban rakhe ia ka jingdap 75 snem jong ka.

Ia kane ka car rally la pynlong da ka North Eastern Region Directorate jong ka National Cadet Corps kum shibynta jong ka Special Outreach Program ka ban sa kut noh ha ka 27 tarik Naiwieng ha Guwahati.

Ha kane ka NER Car Rally ki la don haduh 277 skul, 151 College bad 44 District na ki hynriew tylli ki jylla ka thain shatei lammihngi (Northeast) kiba la wan iashim bynta.

Na ka liang u Myntri Rangbah ka Jylla ula ai ka jingiaroh ia ka synniang jong ka NCC ha ka jingai jingshakri na ka bynta ka Ri bad ka jingai mynsiem ia ki samla ym tang ha kaba iadei bad ka jinglong discipline bad ha kaba iadei bad ka jingai jingshakri hynrei ruh ia ka mynsiem jong ka jingiatylli hapdeng ki samla. U la ai khublei kyrpang ruh ia baroh kiba la iashim bynta ha kane ka rally.

Ka jingthmu jong kane ka Car Rally ka long ban ruh wanrah ia ka jingsngew iajan para dkhot ka NCC, ka jingpynioh ia ka mymsiem nongialam, ka mynsiem  ialeh bad ka mynsiem ieid ri.