Kan ym don ka jinglehniam ha ka kyrdan kum ka Sakrament ia ka jingiathoh shongkurim para kynthei, shynrang

Syllad | The Rising MeghalayaDecember 22, 2023

Ka Jyllaniam Bah Shillong lyngba u Most Rev. Victor Lyngdoh, DD haka 22 tarik Nohprah, ka pyntip sha ki Lyngdoh, ki Riewniam bad ki Parabangeit ka Jyllaniam Bah Shillong ba ka Balang Katholik ka la pynmih paidbah ia ka dulir “Fiducia Supplicans” ha ka 18 tarik Nohprah 2023 lyngba ka Dicastery for the Doctrine of Faith kaba la ai jingbit da u Kpa Bakhuid, u Pople Francis ha kaba u Lyngdoh Katholik u lah ban kyrkhu ia kiba shongkha ym katkum ka ain jong U Blei (para shynrang/kynthei ne same sex marriage) bad kan ym don ka jinglehniam jong ka Balang ka ban iadei kyrdan kum ka Sakrament Jingkyntiew Kurim.

Ka riti lehniam jong ka Sakrament Jingkyntiew kurim ka dei tang na ka bynta ka jingialong kawei jong u shynrang bad ka kynthei ha ka jingiateh jutang ba shijunom.

Kane ka dulir ka thew ia ka jingmut jong ka jingduwai kyrkhu. Kane ka dei ka jingduwai kaba u Lyngdoh u lah ban duwai hi khlem da shim ia ka jingduwai jong ka Balang. Ia kane ka jingduwai kyrkhu ym dei ban sngewthuh bakla ba kane ka dei ka jinglehniam jong ka Sakrament Jingkyntiew kurim jong ka Balang Katholik.

Na kata ka daw, kane ka dulir ka khlem pynkylla ia ka ain tynrai jong ka Sakrament Jingkyntiew kurim ha ka Balang Katholik bad ka jingduwai jong u Lyngdoh kam mut ba u mynjur ne pynshlur ia ka jingleh jong ki.

“To ngin iai bat barabor ia ka jinglong bakyntang jong ka Sakrament Jingkyntiew kurim,” u la ong.

Ha kajuh ka por u Most Rev.Victor Lyngdoh u ai ruh ka jingkhublei Khristmas kaba Suk bad Snem Thymmai ba dap da ki jingkyrkhu.