Kam dei ia ka Sorkar Jylla ba kan shim rai halor ka jingkyntiew bainong ia ki nongtrei ASHA: Ampareen

Syllad | The Rising MeghalayaNovember 7, 2023

Ka Myntri ka Tnat ka koit ka khiah ka sorkar jyll, ka Kong Ampareen Lyngdoh haka 6 tarik Naiwieng kala ong ba ki nongtrei Accredited Social Health Activists (ASHAs) kiba la pynlong ia ka jingiakhih da kaba shong jahthait  ha la ki jong ki iing ki sem ki la ioh ia ka jingsiew ne ka honorarium kaba biang.

Ka Myntri ka la ong ruh ba kam dei satia ia ka sorkar jylla ba kan shim ia ka rai ha kaba iadei bad ka jingkyntiew ia ka jingsiew na ka bynta ki nongtrei ASHA namar ka dei ka rukom treikam ba la pyndonkam hapoh ka ri hi baroh kawei.

Haba kren shuh shuh kala ong ba hadien ka jingialang ba la khot pynlong da u Myntri Rangbah ka jylla, ka Kong Ampareen ka la ong ruh ba ki don ki ASHA ki ba ioh ia ka jingsiew kaba long T.5000 haduh T.7000. Ka la ong ruh ba ki nongtrei ASHA kim hap satia hapoh ka jingpeit jingkhmih jong ka sorkar hynrei hapoh ki village health councils (VHCs).

Ki dei kiba don ia ka bynta kaba kongsan ha ryngkat ki dorbar shnong kiba khmih ban pynthikna ba baroh ki shnong hapoh ka jylla, kumta ruh lada kine ki nongtrei ki pulom ha ka jingshakri kane kan wanrah ka jingeh kaba khraw ha ka liang ka koit ka khiah.

Na ka liang ka Myntri ka buh ruh ka jingkyrpad ia ki ASHA ba kin weng noh ia kane ka jingiakhih kaba dang bteng jong ki bad ban leitphai sha la ki jong ki kam bad noh synniang na ka bynta ka bha ka miat hapoh ka jingkhmih jong ki dorbar shnong.

“KI VHC mynta kiba aijingshakri hapoh ki sub centre kiba dang shen ngi la kyntiew hapoh ka jylla Meghalaya kin long ka bynta kaba kongsan na ka bynta ban pyniasoh sha ka tnat ka koit ka khiah ha ki jingtreikam ki jong ka na ka bynta ban aijingshakri ia ki nongshong shnong jong ka jylla hi baroh kawei,” ong ka Myntri.