Ka UDP kan sa jied noh shen ia u General Secretary bathymmai

Syllad | The Rising MeghalayaJune 19, 2025

Ka United Democratic Party (UDP) shen kan sa jied noh ia u General Secretary bathymmai jong ka hadien ka jingiehnoh kam jong u MLA barim ka Nongthymmai u Bah Jemino Mawthoh.

Katkum ka jingpyntip da u president ka party u Bah Metbah Lyngdoh u la ong ba ka Central Executive Committee (CEC) kan sa shong jingialang mynta u bnai lane ha ka taiew ba nyngkong jong u Naitung ban wan.

“Ngi la pdiang ia ka jingiehnoh kam jong u Bah Jemino Mawthoh. Ka CEC ka ban wan kan sa shong ban iakren halor ka jingdonkam ban jied ia u General Secretary bathymmai jong ka party,” ong u Bah Metbah haba kren sha ki lad pathai khubor ha ka 18 tarik Jylliew.

U Bah Metbah u la ong ruh ba ha ka jingshisha kim pat kyrkieh satia ban pyndep ia kane ka kam, hynrei kum ka party ka donkam ban don ia u General Secretary.

Nalor kata u la ong ruh ba ka UDP ka la nangkhlain bad ia kane la sakhi na kawei ka elekshon Assembly sha kawei pat.

“Ngim artatien ba ngi la nangkhlain bad ngi dang trei bad iaid ha kajuh ka lynti bad ngin dang iai bteng ban trei,” u la bynrap.