Ka UDP kam dei satia ka dkhot ka NEDA, ong u Bah Paul Lyngdoh

Syllad | The Rising MeghalayaMarch 28, 2024

U Nongialam ka seng United Democratic Party (UDP) uba dei ruh u Myntri sorkar u Bah Paul Lyngdoh haka 27 tarik Lber, u la ong ba kane ka party kam dei satia ka dkhot jong ka kynhun North East Democratic Alliance (NEDA) ba la ialam da ka BJP.

“Em ngim don satia hapoh ka NEDA. Ka NEDA ka khlem iakynduh shuh mynta la slem, Ngam tip hi ruh ba la ka dang don ne kam don shuh,” ong u Bah Paul haba kren sha ki lad pathai khubor.

Haba pynpaw ba kam don kano kano ka jingkylli halor ka jingiadei hapdeng ka UDP bad ka NEDA, u Bah Paul u la ong, “Katkum ka manifesto ka jong ngi, ka la don ka mat kaba la pynpaw halor ka jingpyrshah ka jong ngi ia ka Hindutva kum ka nongrim treikam.”

Shuh shuh u la ong, “Ngi la ai jingmut ruh ba dei ban shah bad ailad ha kaba iadei bad ki kam aijingkyrshan pisa da ki ri kiba na shabar na ka bynta ki missionary jong ki Balang Khristan. Ngi la kren pyrshah ruh halor ki kam thombor pyrshah ia ki Khristan ha kylleng ka ri India. Kumta kane ka dei ka nongrim kaba ngi ieng.”