Ka Tura Secretariat kan treikam kum ka additional secretariat, la mang thymmai T.150 klur

Syllad | The Rising MeghalayaMay 28, 2025

U Myntri Rangbah ka Jylla u Conrad K Sangma ha ka 27 tarik Jymmang u la ong ba ka Tura Secretariat kan treikam kum ka Additional Secretariat na ka bynta ka jingmyntoi jong ki nongshong shnong ka Rilum Garo.

Haba aijingkren ha ka jingialang kaba la long ha Samanda ha Williamnagar hadien ka jingplie ia ka jingdro dur (architectural drawing) na ka bynta ka Tura Secretariat, u Myntri Rangbah u la ong, “Ha kaba sdang la buh jingmut ia kane ka project kum ka Mini Secretariat, hynrei ka sorkar ka sngew ba dei ban kyntiew bad pynheh ia ki jingtei khnang ban lah ban kynthup ia baroh ki ophis jong ki tnad bapher bapher, ka ophis u Myntri Rangbah, ophis ki Myntri sorkar bad ki ophisar bad kiwei.”

U la ong ba ka Tura Secretariat kan pynsuk bad pynthikna ia ka jingpynpoi ia ki jingshakri lyngba ka sorkar sha ki nongshong shnong hapoh Rilum Garo.

“Ki nongshong shnong ka Rilum Garo ki hap ban leit shaduh Shillong na ka bynta ki kam bapher bapher kiba iadei bad ka sorkar. Ka jingthmu jong ka Tura Secretariat ka long ban pynthikna ba ki briew na Rilum Garo da kaba suk kin ioh ia ka jingshakri halor ki jingdonkam baroh tang napoh Tura hi,” u la bynrap.

Ka jinglut jingsep ba la mang ha kaba nyngkong ban tei ia kane ka Mini Secretariat ha Tura ka long T.30 klur hynrei ia kaba la mang mynta ha ka jinglut ka ban kot palat T.150 klur.

U la pyntip ruh ba ka Tura Convention Centre kan don marjan bad ka Tura Secretariat kumba la kdew ha ka dur ba la shna da ka architectural 3D. U la pyntip ruh ba ia ka bynta kaba nyngkong jong ka Tura Secretariat yn pyndep ha u Kyllalyngkot 2027.