Ka sorkar MDA ka dei ban shim jingkitkhlieh lada pur ka khlam COVID-19 na jingkit dewiong na Assam ong ka SBYWA

Syllad | The Rising MeghalayaMay 13, 2020

Ka Southern Border Youth Welfare Association (SBYWA), Elaka:Rymbai & Lakadong, East Jaintia Hills kala pynpaw ka jingpyrshah kaba jur halor ka jingailad ka sorkar ban kit dewiong na Assam ban pyndap pynbiang dewiong ïaki kharkhana dewbilat ha East Jaiñtia Hills District.

U Skhembor Shadap, President bad u Namphrangmi L Talang, General Secretary ha u kyrwoh ba kila phah kila pynpaw ba kane ka jingailad ka sorkar ban kit dewiong na bar Jylla, khamtam na Assam, ka jylla kaba la shah ktah haka khlam COVID-19, ka buh ka jingma ïaka Rilum Jaintia Hills ba kynthup iaka East bad West Jaintia ba kane ka khlam kan pur lyngba ki nongniah trok bad ki nongbud trok kiba wan na katei ka Jylla.

Ka SBYWA kala pynpaw baka ai ka jingkyrshan kaba pura iaka seng ki nongkhaïi dewiong kiba na East Jaiñtia Hills kaba kynthup naduh ka Jaiñtia Coal Miner and Dealer Association, East Jaiñtia Coal Supplier Association, Jaiñtia Amalgamated Redressal Forum bad kumjuh Synjuk Waheh Shnong East Jaiñtia, JSM, JNC, HANM, EJNC bad kiwei de ki seng ba pyrshah ia ka rai jong ka sorkar ban wanrah ia u dewiong na Assam sha ki Cement factory kiba don ha East Jaintia.

Ka SBYWA kala buh jingkylli ruh ia ka sorkar “Balei ka shim por iaka sorkar ban lilam ia dewiong 2 lak ton hapoh ka jylla Meghalaya kaba la mynjur da ka NGT. Lada ka sorkar ka shimkhia ban lilam kloi ia une u dewiong kam don jingeh ia ki nongkhaii dewiong ka district ban pynbiang dewiong ia ki khakhana ban lait na jingiaid jingieng ki briew ne ki nongniah trok bad ki nongbud trok na kawei ka Jylla sha kawei pat.”. 

Ka SBYWA kala dawa na ka sorkar ban shimkhia ban leh ïa kaba donkam ha kaban pynkhreh iaka jinglilam ia u dewiong uba la mynjur ka NGT ban lilam, khnang ba ki paidbah ne ki nongkhaii dewiong kiba la shah ktah naka jngkhang khyrdep ruh kin ioh ka lah ban khaii pateng tang hapoh ka jylla.

Ka SBYWA ka ong ruh ba hadpeng ka jingiatreilang ki paidbah ban iakhun pyrshah iaka khlam COVID-19 ha baroh ki ar District lada jia ba wan poi kane ka khlam ha East bad West Jaintia lyngba ki nongniah trok bad nongbud trok ba kit dewiong, ka sorkar ka dei ban shim ka jingkitkhlieh, namar ba haduh mynta ka jingpynkhreh iaka jingiakhun iaka khlam COVID-19 ruh kam pat biang satia.