Ka Sorkar kan khang ia ki khyrdop lum khajna beain ki Disrict Council: Dy CM

Syllad | The Rising MeghalayaMay 21, 2025

U Symbud Myntri Rangbah uba khmih ia ki kam pohiing u Bah Prestone Tynsong haka 20 tarik Jymmang u la ong ba ka sorkar jylla kan khang ia kino kino ki khyrdop lum khajna ba pynieng da ki Autonomous District Council (ADC) lada ki long kiba beain.

Haba kren sha ki lad pathai khubor, u Bah Prestone u la ong, “Kino kino ki khyrdop lum khajna ne khyrdop talasi ki dei ban long kiba la kyrshan da ka ain. Lada kim hap hapoh ki kyndon ain kumta ruh kin ym don jaka, ngin hap ban pynpra bad ngi hap ban khang ia ki.”

Ka Khasi Hills Autonomous District Council (KHADC) ka la ther tyngeh ia ka jingleh jong ki bor District ka Ri Bhoi namar ka jingkhangdam ia ka khyrdop lum khajna ha Umdihar khlem da ai kano kano ka jingpyntip bad kaba long kum ka jingleh iebin ia ka bor jong ka Council.

Ha kaba iadei bad ka jingjia shah thang ki trok hapoh ka phyllaw jong ka kompeni Star Cement ha Lumshnong, East Jaintia Hills, u Bah Prestone u la ong ba la lah ba tehlakam ia ka jinglong jingman.

“Na ka liang u DC bad SP ki la shimkhia ia kane ka jinglong jingman. Ngi la dep lypa ban pynkhlain ia ki bor pahara ha katei ka jaka. Nga sngewkmen ba kam shym la don shuh kano kano ka jingjia bad nga thikna ba hapoh kine ki khyndiat sngi ki ban wan baroh kiei kiei kin long kiba iaid beit iaid ryntih kumba ju long,” u la bynrap.

Lah ban kdew ba haduh 15 tylli ki trok ki la shah thang hapoh Star Cement ha ka miet jong ka 18 tarik Jymmang hadien ba uwei u nongniah jong ka kali Pickup truck u la iap hashen na ka jingshah iuh ha ka trok jong kane ka kompeni.