Ka Sorkar kam pat rai kut ban pynsangeh halor ka project lynti Rel ha ka Jylla: Sniawbhalang

Syllad | The Rising MeghalayaOctober 25, 2024

U Symbud Myntri Rangbah uba khmih ia ka Tnad Transport, u Bah Sniawbhalang Dhar ha ka 25 tarik u Risaw u la ong ba ka Sorkar Jylla kam pat shym la rai kut satia ban pynsangeh ha kaba iadei bad ka jingtyrwa pyntreikam ia ka project lynti rel ha ka Jylla.

Haba kren sha ki lad pathai khubor u Myntri u la ong, “Ngim pat shym la shim ia ka rai ban pynsangeh noh. Ngin dang shim ia ka rai, namar ha kaba nyngkong ngin pyrshang ban ioh ia ka jingmynjur hapdeng baroh ki kynhun bapher bapher.”

U la ong ruh, “Tad lada ngi ioh ia ka jingmynjur lang na baroh ngin sa shim ia ka rai kum ka Sorkar.”

Dang shen ka Meghalaya Tourism Development Forum (MTDF) ka la ban jur halor ka jingdonkam ia ka Sorkar Jylla ba kan wanrah ia ki policy treikam kiba neh na ka bynta ban kyntiew ia ki kam jngohkai ha ka Jylla, kata ha kaba ka la kyrpad ruh ia ka Sorkar Pdeng ban mynjur na ka bynta ban wanrah ia ka High Speed Luxury Rail Network khnang ban pynkloi ia ka leit ka wan na Guwahati sha Shillong.

Haba kylli halor ka jingmut kaba iadei bad ka jingpyntreikam ia kane ka Luxury Rail Network, u Myntri u la ong ba kane ka jingtyrwa jong ka MTDF ka dei kaba biang.

“Hynrei watla katta kine ki hap ki hap hapoh ka Tnad Tourism. Lehse nga hap ban pan ia ki jingtip na kane ka Tnad ia kaei kaba la iakren, bad ia mynta hi kane kam dei satia hapoh ka Tnad ka jong nga hynrei ka Tnad Tourism,” u la bynrap.