Ka Sorkar ka la pynlut palat T.1000 klur ban tei bad kyntiew ia ki skul ha kylleng ka Jylla: CM

Syllad | The Rising MeghalayaAugust 30, 2025

U Myntri Rangbah ka jylla u Conrad K Sangma ha ka 28 tarik Nailar u la ong ba ka sorkar jong u ka la pynlut palat T.1000 klur ha kaba pynroi, ban pynbha bad ban tei ia ki skul sorkar naduh ki kyrdan Lower Primary, Upper Primary, Secondary bad Higher Secondary ha kylleng ka Jylla.

Haba kren ha ka jingplie ia ka building thymmai jong ka Mibonpara Secondary School, u Conrad u la ong ba ka sorkar ka phaikhmat bad kut jingmut skhem ban wanrah ka jingkylla bad kyntiew ia ka pule puthi wat hapdeng kiba bun ki jingeh kiba iakynduh.

“Lyngba ka jingiatreilang jong ka sorkar, ki nongialam, ophisar bad ka imlang sahlang ngi lah ban jop ia kine ki jingeh bad ban wanrah ka jingkylla ha ka pule puthi ha ka jylla,” u la ong. U la ong ruh ba ka sorkar jylla ka buh ia ka thong kaba hakhmat eh ban kyntiew na ka bynta ka bha ka miat ha ka imlang sahlang.

“Ka pule puthi ka la ju long ka thong kaba kongsan tam na ka bynta jong ngi bad ka sorkar na ka Mang Tyngka kaba T.30,000 klur ka la mang haduh T.2,500 klur na ka bynta ka pule puthi, kaba pynlong ruh kum ka mang tyngka kaba heh tam namar ngi ngeit ba ia ka jingkiew bad ka jingroi yn lah ban wanrah tang lyngba ka pule puthi bad lyngba ka jingpynroi ia ki briew jong ngi,” u la bynrap.

U Myntri Rangbah u pyntip ruh ba haduh 50 percent na ki nongshong shnong ka Meghalaya ki dei kiba hapoh jong ka 20 snem rta, bad ki skhim, ki prokram bad ki policy jong ka sorkar ki donkam ban kdew sha ka jingkyntiew ia kane ka jingdon jingem jong ka jylla kaba dei ki samla.

Nalor kata u la ong ruh ba ka Chokpot namar ka don ha ka jaka kaba kongsan bha, kumta ka long ka zone kaba donkam ia ki lad pyniasoh ym tang na ka bynta ka South Garo Hills District, hynrei kumjuh bad ki District kiba marjan. U la ong ba ia ka surok na Deku sha Chokpot la dep ban mang da ka World Bank bad ia ka surok na Chokpot sha Sibbari yn sa pyntreikam shen namar ka Chokpot ka dei ka lynti pyniasoh kaba kongsan.

U Conrad u la kyntu ruh ia ki samla pule ban long kiba iaineh, ban trei shitom bad don ka jingieit jingburom ia la ki tynrai, ia ka jylla bad ia la ka jong ka ri.