Ka Sorkar ka la bakla jur ban weng noh ia ki bor pulit na ki jaka khappud ba iakajia: FKJGP

Syllad | The Rising MeghalayaOctober 3, 2023

Ka Seng Federation of Khasi Jaintia and Garo People (FKJGP) haka sngi ba Ar kala pynpaw ba ka jingshim rai jong ka Sorkar Meghalaya ban weng noh ia ki bor pahara pulit na ki jaka kiba don hapdeng ka jingiakajia pud ha khappud ka Meghalaya-Assam ka dei ka jingleh bakla kaba jur, bad ka long kum ka jingbakla ban sumar ia ka jingpang kaba kum ki nongshong shnong khappud ki la iai mad na ka por sha ka por.

Na ka liang u President ka FKJGP u Bah Dundee C Khongsit haba iakren u la ong ba kane ka jingleh jong ka sorkar jylla i kumba ka dei ka jingbakla ha ka rukom sumar ia ka jingpang da kaba weng noh ia ki bor pahara na ki thain khappud, bad ka long pynban kumba ai dawai ia kiba pang kpoh da ka dawai ktha khlieh. Nalor kata u la ong ruh ba kane ka jingleh jong ka sorkar ka long pynban kumba ai petrol ha ka ding kaba la klang lypa.

Nalor kata ula ong ba ki jingeh kin nang mih bad kham sniew shuh shuh da kaba phaihakhmat khamtam ha kaba iadei bad ka jingbym iasngewthuh ha ka ktien ka thylliej da ka jingwanrah ia ki bor pahara jong ka Central Reserve Police Force (CRPF) ha ki jaka khappud. U la ong ruh ba ha ka jingshisha ia ki pulit CRPF la buh kum ki bor pahara bynrap ha kino kino ki jingjia kiba mih ki jingkulmar ba pynthut ia ka shongsuk shongsain.

Hadien ka thma iasiat jri bad ki Karbi, da ka jingshngain ioh leit ot ki Khasi Pnar ia u kba u khaw na ki pyntha

Kumta ruh u la ong ba na ka liang ka Seng ka sngew ba kam iahap ia baroh ki ar jylla ka Meghalaya bad Assam bad ba ka Meghalaya kan weng noh iala ki jong ki bor pahara pulit na ki jaka khappud.

Lah ban kdew ba ha ka sngi Saitjain ba la lah ka jingiakren hapdeng ki Myntri Rangbah ka Assam bad Meghalaya kila rai ban buh bujli noh da ki CRPF kum ki bor pahara bym iashah liang ha ki jaka iakajia pud haba bthah iala ki jong ki Pulit ban kynran dien noh shibynta ban wanrah ka jingshaniah jong ki paidbah ha kaba iadei bad ka kam iapynbeit pud hapdeng kine ki ar jylla.