Ka Sorkar ka khlem sangeh ban buddien ia ka jingdawa pyntreikam ILP ha ka jylla: President UDP

Syllad | The Rising MeghalayaJune 19, 2025

U President ka United Democratic Party (UDP) u Bah Metbah Lyngdoh haka 18 tarik Jylliew u la ong ba ka Sorkar Jylla ka dang iai bteng ban buddien khlem sangeh bad ka Sorkar Pdeng halor ka jingdawa ban pyntreikam noh mardor ia ka Inner Line Permit (ILP) ha ka jylla.

Haba kren sha ki lad pathai khubor, u Bah Metbah u la pynkynmaw ba ka Iingdorbar thaw ain jong ki 60 ngut ki MLA da kawei ka jingmut ka la mynjur ia ka Resolution halor kane ka mat ha kaba la phah ruh sha ka Sorkar India na ka bynta ban ioh ia ka jingmynjur.

U la ong ba u Myntri Rangbah bad ka kynhun Myntri Sorkar ki la iai buddien bad ka Sorkar Pdeng na ka bynta ban mynjur noh ia katei ia jingtyrwa haduh mynta.

Haba kylli une u nongialam ka UDP u la ong ba ki don katto katne ki bynta kiba lah ban iatyngkhuh bad ki ain jong ka Sorkar Pdeng.

“Ia kane ka mat donkam ban pynbeit noh lada jia ba ka don bad ia kaei kaba pynsangeh ia ka sorkar ba kan pyniaid shakhmat ia kane nga ngeit skhem kin don ki katto katne ki mat ne ki jingeh kaba long shibynta jong ka kam ia kaba ka Sorkar Peng ka dang pyrshang ban khmih bniah,” u la ong.

Ha kaba iadei bad ka jingsahteng ban pyntreikam ia ka ILP, u Bah Metbah u la ong ba ka Meghalaya Residents Safety and Security Act (MRSSA) kan lah ban iarap shibun ban shim ia ki sienjam ban tehlakam ia ka jingwan rung kyrthep ki briew kiba na bar sha kane ka jylla.

“Mynta ha kaba iadei bad ka MRSSA, ngam iohi ei ei ruh ba kan don kano kano ka jingbakla. Ki lah ban ioh beit ia katei ka juh ban peit ba kano kano ka rukom pyniaid bad ka rukom treikam kaba dei ban bud ryntih halor ka jingsngewkhia kaba iadei bad ka jingwan rung kyrthep ki briew kiba na shabar bad nga tharai kane kan iarap shibun,” u la bynrap.