Ka Sorkar ka dei ban mudui case pynjah burom ia kito kiba pynthohbria ia ka Jylla: Hek

Syllad | The Rising MeghalayaJune 10, 2025

Hadien ka jingleit pyndem jong ka Sonam hakhmat ki pulit bad ka jingshah kem jong ki kiwei pat ki runar halor ka jingjia shah pyniap u kurim jong ka, u Raja Raghuvanshi, na ka liang u Myntri ka sorkar Jylla u Bah AL Hek haka sngi Nyngkong u la ban jur ba dei ban mudui da ka case pynjah burom ne defamation case pyrshah ia kito kiba donkti ha kaba pynthohbria ia ka jylla Meghalaya.

Lah ban kdew ba ka Sonam bad u Raja kiba dang shu pyndep shen ia ka jingiathoh shongkurim ki la jah rngai naduh ka 23 tarik u Jymmang ba la dep hadien ba ki la wan shangkai sngewbha sha ka thain Sohra, ha kaba ia ka metiap jong u Raja la lapdien na ka jaka riat hajan ka kshaid Weisawdong ha ka 2 tarik u Jylliew.

“Baroh ki dkhot jong katei ka longiing Raghuvanshi ki la kynnoh ia ka sorkar Meghalaya bad ia ka tnad pulit bad khamtam ruh ka long kaba pynjah burom namar ki la kynnoh ia ki nongshong shnong ka Meghalaya halor katei ka jingjia shah pyniap jong utei u nong Indore,” ong u Bah Hek haba kren sha ki lad pathai khubor.

Haba kylli, u Myntri u la ong, “Nga la dep ban ong ia phi naduh kham hashwa ba ngi dei ban mudui da ka case pynjah burom pyrshah ia kito ki briew kiba pynthohbria ia ka Meghalaya bad ia ki nongshong shnong ka jylla.”

Haba ai khublei kyrpang ia ki bor pulit ka Jylla, u Bah Hek u la ong, “Ki la leh ia ka kam kaba khraw shibun.Tang hapoh hynniew sngi ki la ioh ban kem noh ia ki briew kiba donkti, bad tang hapoh kine ki sngi ki la lah ban pynpaw ia ka jingtbit ka jong ki.”

Ka Sonam ka la leit  pyndem noh ialade hakhmat ki bor pulit ha Nandganj Police Station ha Ghazipur district, Uttar Pradesh ha ka miet jong ka 8 tarik Jylliew. Nalor ka Sonam ki la don sa lai ngut kiwei pat kiba dei baroh na Madhya Pradesh kiba la shah kem noh ha kaba ia uwei la ioh kem na UP bad arngut na MP katba uwei pat uba dei na MP u dang don hapdeng ka jingphet rieh.