Ka Sorkar ka dang bishar bniah ia ka jingdawa pynkiew tulop ki nonghikai: Myntri

Syllad | The Rising MeghalayaSeptember 6, 2025

U Myntri ka Tnad pule puthi u Rakkam A Sangma u la kular ba ka Sorkar Jylla kan bishar bniah ia ka jingtyrwa ban pynkiew tulop ia ki nonghikai hadien ba ka jinglong jingman ha ka pla tyngka ka la kham biang.

Kane ka jingpynpaw jong u Myntri ka la wan long hadien ba ka Federation of Adhoc School Teachers of Meghalaya (FASTOM) dang shen ka la pynbna ia ka rai ban mih sha surok ban pynlong da ka jingiakhih halor ka jingbym lah ka sorkar ban kyntiew ia ka tulop jong ki nonghikai adhoc ha ka jylla.

Haba jubab ia kane, u Rakkam u la pynpaw sha ki lad pathai khubor ha ka 5 tarik Nailur ba ka sorkar jylla kam don ia ka jingbahkhlieh ban siew ia ka tulop jong ki nonghikai ha ki skul grant-in-aid.

Katkum ka jingong ka jong u, kine ki dei ki skul kiba la seng da ki School Managing Committees (SMC) kiba long trai ia ki iingskul bad ka jingthung ia ki nonghikai.

“Ka Sorkar ka shu aijingiarap grant-in-aid na ka bynta ka tulop jong ki nonghikai, hynrei ki SMC ruh ki dei ban don ia ka jingkitkhlieh ban rai ha kaba iadei bad ka jingsiew tulop ia ki nonghikai, bad ka dei ruh ka kamram jong ki SMC ban kyntiew ne ban siew ia ka tulop jong ki,” u la ong.

“Watla katta, haba ka jinglong jingman ha ka liang ka pla ryngka ka la kham bit kham biang, ka sorkar ka dang wad bad bishar bniah ia ka jingtyrwa kyntiew tulop.Kane ka dei ka jingdawa jong baroh ki jait nonghikai ha kylleng ka jylla. Lada ngi rai na ka bynta ki nonghikai adhoc, ki nonghikai SSA ruh ki don haduh 14,000 -15,000, kumta kan ym lah ban long ban shu rai lang ia baroh namar ka jinglong jingman ha ka pla tyngka kam pat long satia kaba bit ba biang,” ong u Sangma.

Haba kyntu ia ka FASTOM ba kan ym iaid shakhmat ha kaba iadei bad ka jingthmu ban pynlong jingiakhih, u Myntri u la ong, “Ka Sorkar ka dang wad ia ki lad ki lynti kumno ban kyrshan ia ki. Ynda ka jinglong jingman ha ka liang ka pisa tyngka ka la kham bit kham biang la thikna ba ka sorkar kan bishar bniah ia kane ka jingdawa jong ki nonghikai.”