Ka Sorkar ka dang bishar bniah ban pynkhlain ia ka MRSSA ne wanrah da ka ain thymmai: Dy CM

Syllad | The Rising MeghalayaJuly 19, 2025

U Symbud Myntri Rangbah ka Jylla uba khmih ia ka Tnad kam Pohiing (Police) u Bah Prestone Tynsong haka sngi Thohdieng u la ong ba ka sorkar ka don ia ka jingthmu ban bishar bniah ban nangpynkhlain shuh shuh ia ka Meghalaya Residents Safety and Security Act (MRSSA) lane ban wanrah noh da ka ain thymmai ban tehlakam ia ka jingnangkiew ka jingwan rungtuh ki briew napoh Bangladesh.

Na ka liang u Bah Prestone u la ong ba ka long kaba donkam ia ki ain kiba treikam bha khnang ban lah ban weng ia ki jingeh ha kaba iadei bad ka jingnangkiew ka jingwan rungtuh da ki briew kiba na bar shapoh kane ka jylla.

Haba kren sha ki nongthoh khubor, u Bah Prestone u la ong ba ka sorkar ka dang bishar bniah ia ki lynti la kan pynkylla ia ka ain MRSSA kaba la don lypa lane ban wanrah da ka ain kaba thymmai ka ban lah ban pyndap ia ki jinduna bad ka ban pynkhlain ia ki lad jingiada.

“Ka Sorkar ka dang pyrkhat sani bha halor kane ka phang. Nga hi shimet nga sngew ba ka long kaba kongsan ba ngi donkam kyrkieh ban don ia kino kino ki lad ki lynti ha ka kyrdan jong jylla,” u la ong haba bynrap ba kane kan nangiarap shuh shuh nalor ki ain ka Sorkar Pdeng ha ka ban tehlakam ia ka jingwan rungtuh jong ki briew kiba na bar ri.

Namar ka jingdon jong haduh 443 km ki jaka khappud bad ka Bangladesh, u Bah Prestone u la ong ba ka Meghalaya ka la iakynduh ia ki jingeh ban tehlakam ia ka jingwan rungtuh ki briew kiba na bar namar kiba bun na ki, ki wan rung lyngba ki lynti bapher bapher, kaba kynthup na Kolkata, Rajasthan bad Bihar.

U Bah Prestone u la pynpaw ba um don satia bad u ia ki jingkhein kaba iadei bad ka jingdon jong ki briew kiba wan rungtuh. Hynrei, watla katta u la kular ba na ka liang ka sorkar ka dang trei ban pynkhlain ia ki lad jingiada ban khanglad ia ka jingwan rungtuh ha kaba ki shipai BSF bad ki bor pulit ki la shim ia ka bynta kaba kongsan ha kine ki jingpyrshang.