Ka Sorkar ka dang ap ia ka jubab na ka HNLC halor ka jingiakren iasuk, ong u CM ka jylla

Syllad | The Rising MeghalayaSeptember 14, 2023

U Myntri Rangbah ka jylla u Conrad K Sangma haka sngi Palei u la ong ba na ka liang ka sorkar ka dang ap ia ka jubab na ka Hynniewtrep National Liberation Council (HNLC) ha kaba iadei bad ka jingpyniaid shakhmat ia ka jingkren iasuk.

Haba kren sha ki lad pathai khubor u Sangma u la ong; “Ngi dang ap ia ka jubab na ka liang jong ki, bad hadien ba ngi la ioh ia ka jubab ngin sa shim ia ka rai kumno ban pyniaid shakhmat.”

Ha kaba iadei bad ka jingshah pynngat jong ki heh nongialam ka HNLC ha ka National Investigation Agency (NIA) ha ka por ba ka jingiakren iasuk ka dang iaid shakhmat, na ka liang u CM u la ong ba kane ka kam la dep ban iakren bad ka sorkar pdeng. U la ong ruh ba kane ka case ka dei kaba rim bad ba na ka liang ka sorkar kan khmih kumno ban pyniaid ia kane ka kam hadien ba la sdang ka jingiakren iasuk.

U la ong ruh ba kumba u la pynpaw ba ha kiba kum kine ki jingiakren ngi donkam ban pynthikna ba kan don ka jingshimkhia na baroh ki liang. Baroh ki kynhun kiba ia don bynta ki donkam ban don ia kata ka jingkut jingmut ha kaba iadei bad baroh ki jingiakren.

“Katba ngi dang iaid shakhmat na ka bynta ka jingiakren, ki don katto katne ki bynta kiba jyrwit jyrwat, katto katne na ka liang ka jong ki bad katto katne na ka liang ka jong ngi kumjuh bad baroh ki dang khmih bniah halor kine. Ngi la pyntip sha ki baroh lyngba u ksiang bad ngi dang ap ia ka jubab na ka liang ka jong ki,” ong u CM.

“Ka dei ka kam kaba dang iaid shakhmat bad kam dei na ka liang ka sorkar jylla, hynrei na ka liang ka sorkar pdeng, bad ngi la dep phah lypa ia ki jingtip sha ki bad dei na ka ta ka daw Nga la ong ba katba ka jingiakren ka dang iaid shakhmat yn hap ban khmih halor kiba bun ki bynta bad ba ia ki jingiakren lah ban pynlong ha ryngkat ki kynhun kiba ia don bynta na ka liang ka sorkar pdeng, ka sorkar jylla bad ruh na ka liang ka jong ki, bad ngin khmih kumno ban pyniaid shakhmat,” u la ong shuh shuh.