Ka shong ha u VC ka NEHU ba un weng ia ki kynrum kynram halor ka NEP: Shangpliang

Syllad | The Rising MeghalayaAugust 29, 2023

U Adviser ka Tnat pule puthi ka sorkar jylla, u Bah M Shangpliang mynta ka sngi ba Ar u la ong ba ka kynrum kynram kaba don mynta bad ka  Meghalaya College Teachers’ Association (MCTA) halor ka jingpyntreikam ia ka National Education Policy (NEP) ka shong ha u Vice Chancellor jong ka  North Eastern Hill University (NEHU) u Prof Prabha Shankar Shukla ba un shim ia ki sienjam ban weng bad pynkut noh.

“Kane ka jingbym poi sha ka jingiamynjur hapdeng u VC bad ka MCTA ka shong ha u VC ba un weng ia kane ka jingeh, ha kaba Nga la ioh sngew ruh ba na ka liang u VC u la khot ia ki sha ka jingiakren,” pynpaw u Bah Shangpliang sha ki lad pathai khubor.

“Ngin ieh ha ka jingstad jong u Vice Chancellor bad Nga kyrmen ba yn lah ban weng ia kine ki jingeh,” u la ong shuh shuh.

Lah ban kdew ba na ka liang ka MCTA ka la kyntu ia u VC ka NEHU ba u dei ban weng noh ia ka jingpyntip kaba don jingdkhoh ia kaba la mih ha ka 12 tarik u Naitung khnang ban lah ban pynkut noh ia kane ka kynrum kynram kaba iadei bad ka NEP.

Na ka liang u Adviser ka sorkar jylla u la ieng halor ka nongrim kaba shai halor ka mat kaba iadei bad ka NEP. “Phi la iohsngew na u Myntri Rangbah bad u Myntri ka Tnat pule puthi ka jylla ba yn pyntreikam ia ka education policy ha ka jylla.Mynta ki la don shibun ki kolej kiba la sdang pyntreikam ia ka NEP.Mynta ki kolej sorkar jong ngi ruh kin sdang ban pyntreikam, bad ka jingpynkhreh ia kane ka la iaid shakhmat,” ong shuh shuh u Adviser ka sorkar.

Kumta ruh u la ong ba kawei hadien kawei ka jingpyntreikam ia kane ka policy kan sdang namar ki dang don shibun kiei kiei ia kiba dang dei ban pyndep. “Ngi dei ban kyntiew bad pynbiang ia ki jaka pule katkum ki jingdonkam jong ka NEP.Ngi hap ruh ban thung shuh shuh ia ki nonghikai, kumta kine kiei kiei ki dei kiba donkam ban pyniaid shakhmat bad ba ia kane ka polisi hi baroh kawei hap ban pyntreikam shakhmat kumba ka dei ban long,” u la ong shuh shuh.