Ka Shangpung kan sa tam ia ka Mawlynnong ha ka jingkhuid lada shim ia ka jingkitkhlieh: Comingone

Syllad | The Rising MeghalayaAugust 31, 2025

“Ka shnong Shangpung, West Jaintia Hills ruh kan sa tam wat ia ka shnong Mawlynnong ka shnong kaba pawkhmat ha ka pyrthei kum ka shnong kaba khuid tam ha ka dewbah Asia lada iwei pa iwei na ki nongshong shnong kin shim ia ka jingkitkhlieh na ka bynta ka jingkhuid jingsuba,” ong u Myntri sorkar bad MLA ka thain u Bah Comingone Ymbon haba kren ha ka jingpynlong ia ka jingpynkhuid shnong ha Shangpung ha ka 30 tarik Nailar.

Ia kane ka jingpynkhuid shnong la pynlong da ka Shangpung College bad ia kaba la lam khmat da ka samla Larishisha Suiam kaba dei ka khun jong une u MLA bad kaba la pyndep ia ka MBA na Australia bad kaba trei ruh ha katei ka ri.

Watla ka shong shabar jong ka ri hynrei ka la wanphai da ka jingtmu ban ai biang sha ka imlang sahlang jong ka da kaba pynshlur ia ka kolshor jong ka jingkhuid jingsuba kaba neh bad ka jingkitkhlieh kum ki nongshong shnong.

Ia kane ka prokram la kyrshan borbah bad la bei tyngka ruh da une u Myntri uba la pynkynmaw ba ka jingkhuid jingsuba kam dei tang ka jingitynnad hynrei ka pynpaw ia ka jinglong ba ryntih bad ka jingkiew jong ka imlang ka sahlang. U la kyntu ruh ia ki samla pule ban long ki nonglamktien na ka bynta ka jingkhuid jingsuba, ban pynphriang ia ka jingsngewthuh shabar ki jaka pule jong ki, sha ki iing ki sem, ki iew ki hat bad ki jaka paidbah.

Kane ka jingpynkhuid ka la sdang na Phramer ha kaba baroh ki dukan ki la khang khyrdep lut kum ka dak jong ka jingiatylli, ha kaba ki nongshong shnong naduh ki longkmie longkpa, ki samla bad khynnah ki la pyniasoh lang ha kane ka jingpynkhuid ia ki kper ki prah bad ki phyllaw jong ki kumjuh ia ki lynti syngkien bad ki jaka paidbah.

Ki samla pule ka Shangpung College ki la pynleit jingmut hapoh ka jaka iew ha Iawmuchai da kaba weng lut ia baroh ki jingjaboh ha kaba kut jong ka sngi.

Shwa kane ka jingpynkhuid la pynlong ia ka jingialang kaba lyngkot ha Iawmuchai ha kaba la ia don lang u MLA, EE PWD Shangpung Division K. Pakma, President ka Governing Body Shangpung College P. Marwein, Principal Dr. D.G. Lyngdoh, Dolloi ka Shangpung Elaka Chanki Langbang, ki Rangbah Shnong bad ki dkhot jong ka Synjuk ki Rangbah Shnong Shangpung. 

Na ka liang u Bah Comingone u la khot ruh ia ki nongshong shnong ba kin sangeh noh ban bret pathar ia ki jaboh jabain khamtam ki plastik bad ban kiar ruh na kaba bret ia ki jaboh jabain bad ki song jingbam na ki kali.

Ban tehlakam ia ka jingbret jaboh pathar, u la pynbna ruh ba shen ka Shangpung Pyllun kan sa ioh ia ka trok kit niut kaba thymmai lyngba ka MLA skhim.

Katba ka samla Larishisha Suiam ha ka jingkren ka la ong ba kane ka sienjam ka long kum u mawjam ban pynkynmaw ia ki briew ba ka jingkhuid kam dei ban long tang ha ki iing ki sem hynrei ban pyniar sha ki jaka paidbah, ki jaka iew bad ki kyndong kynshot jong ka shnong ka thaw.