Ka Sawakani Lakiang ka kynthei ba nyngkong naka Jylla ban ioh takma ksiar naka SAARC Bodybuilding C’ship

Syllad | The Rising MeghalayaMay 23, 2025

Ha ka jingjop ka ban sah histori bad kaba buh ia ka Meghalaya ha ka map ka jingialehkai Bodybuilding ha ka pyrthei, ka Sawakani Lakiang na Tpep Pale, Jowai, ka la kylla long ka kynthei kaba nyngkong eh na ka jylla ka ban jop ia ka takma ksiar ha ka lympung ialehkai SAARC Bodybuilding Championship bad ban ioh ia ka Pro Card.

Ka Sawakani ka la ioh ia ka kyrdan kaba hakhliehduh ha ka thup Women’s Bikini Model ha ka lympung ba pawnam ba la pynlong da ka World Fitness Federation jong ka South Asian Association for Regional Cooperation (SAARC), kaba la long ha Mumbai ha ka 19 tarik Jymmang.

Ka jingjop ka jong ka ka dei ka dei u mawjam ba kongsan ym tang na ka bynta ka district, hynrei na ka bynta ka jylla hi baroh kawei bad kaba long ruh kum ka jingai mynsiem na ka bynta kiwei pat ki para kynthei.

Shibynta ban leh burom ia kane ka jingjop jong ka, ka District Social Welfare Department ha ryngkat ka jingiatreilang bad ka District Hub for Empowerment of Women (DHEW) lem bad ka Jowai Women Police Station, ki la pynlong ia ka jingialang pynkup burom ha ka ophis jong ka DSWO ha Mookyrdup, Jowai ha kaba la synran lang ia ka Sawakani da u coach u Dr Desire Kynjing lem bad kiba haiing hasem jong ka.

Mynta ka Lakiang ka shakri kum ka Ambassador na ka bynta ka jingthmu jong ka Beti Bachao Beti Padhao ha West Jaintia Hills. Ka Lakiang ka la long ruh ka sur na ka bynta ka jingpynkup bor ia ki kynthei.

Na ka liang ki heh sorkar ki la pyrto ia ka ym tang namar ka jingtbit jong ka ha ka jingialehkai hynrei ruh namar ka long ka nuksa ban pynpaw ia ka jingdon ia ka discipline, ka jingtrei shitom bad ka jingshlur.

Ha kane ka prokram la ia don lang ruh ka Inspector I. Kharpran, Officer-in-Charge ka Women Police Station, Jowai; FG Rynnga, District Mission Coordinator, DHEW lem bad ki ophisar bad ki staff na ka DHEW and the Social Welfare Department.