Ka samla Rose Angelina ka nuksa ban wanrah jingkylla ha ka sengkam sengjam lyngba ka Digital

Syllad | The Rising MeghalayaJuly 18, 2025

Ka samla Rose Angelina M. Kharsyntiew na Meghalaya ka la kylla long ka nongkdew lynti na ka bynta kiwei pat kum ka nongwad kam sha ka nongai kam ai jam bad ka nongialam ha ka imlang sahlang.

Katba ka ri ka dang rakhe ia ka jingdap 10 snem jong ka prokram Digital India, ka jingiaid lynti kaba ai mynsiem jong ka samla Rose Angelina kaba dei ka nongseng kam hapoh shnong-Village Level Entrepreneur (VLE) na ka thain Mairang, Eastern West Khasi Hills, ka la paw pyrthei kum ka nuksa kaba khlain kumno ba ka jingioh ia ka lad digital ka lah ban pynkylla ia ka jingim na tynrai.

Ka samla Rose kaba la kylla long ka nongwad kam ha u snem 2015, mynta ka la kylla long ka nongai kam ai jam ia kiwei pat bad kaba la ioh ia ka burom ha ka imlang ka sahlang. Lyngba ka Common Services Centre (CSC) kaba la ai kyrteng Rose CSC ha Mairang, ka la ai ia ki jingshakri ba donkam kiba bun jait, kata ha kaba iadei bad ki skhim sorkar, digital banking, insurance, telemedicine, education bad rural e-commerce beit beit sha ki paidbah ha ki thain nongkyndong kiba pajih.

Ka la seng ruh ia ka jaka pynmih ia ki sanitary pad hapoh ka sienjam jong ka Stree Swabhiman kaba kyntiew ia ka jingkhuid jingsuba hapdeng ki kynthei ha ka por poi bnai bad kaba la plie ia ka lad aikam ia jam hapdeng ki kynthei trai shnong.

Kane ka samla ka dei napdeng ki VLE kiba la shah pynkup burom ha ka jingrakhe ia ka Digital India@10 kaba la pynlong ha Yashobhoomi Convention Centre ha Dwarka, New Delhi haka 16 tarik Naitung. Kane ka jingialang ba la ialam da u Myntri ka Tnad Electronics & IT u Ashwini Vaishnaw bad u Myntri Khynnah ka Sorkar Pdeng u Jitin Prasada kiba la ai ka jingithuh kaba kyrpang ia ka jingnoh synniang kaba phylla jong ki CSC kaba pynduna ia ka jingiapher ha ka Digital jong ka ri India.

“Hapdeng ki jaka lum bad ki shnong kiba jngai ha ka jylla Meghalaya, ka Rose Angelina ha kaba jar jar ka la ialam ia ka jingkylla ha ki jingtreikam digital,” ong u Ashwini bad bynrap “Ki jingtrei jong ka ki pyni kumno ia ka teknologi haba pynioh ia ka lad ka lah ban kyntiew ia ka imlang sahlang hi baroh kawei.”

Naduh ba la sdang ia ka ha u snem 2014, ka CSC network ka la nangkiew na ka 83,000 sha ki palat 5.5 lak ki centre, kaba la kdup mynta haduh jan kumba 90% na ki shnong ha India. Ka bor kaba nangroi ha kane ka jingialeh ka dei ka VLE ki kynthei ha kaba haduh palat 74,000 ngut na ki, ki la ai ia ki jingshakri kiba kongsan bad kiba tei ia ka imlang sahlang lyngba ka jingpynkup bor da ka digital.

Ka Sorkar India ka la pynbna ia ki sienkam ha baroh kawei ka ri na ka bynta ban aijinghikai ia ki 10 lak ngut ki nongshong shnong ha ka Artificial Intelligence khlem donkam jingsiew. Yn kham phaikhmat kyrpang sha ki nongseng kam ha ki shnong ki thaw (VLE) hapoh kane ka sienjam ka ban pynskhem ia ka bynta jong ki Common Service Centres (CSC) ha ka jingiaid lynti jong ka jingkylla ha ka digital jong ka ri India.

Kane ka sienjam kaba thymmai kum ka AI training ka bym donkam jingsiew sha ki 10 lak ngut ki briew bad ka jingbteng ban pyniar ia ki jingshakri lyngba ki CSC, ki shiphew snem ki ban wan jong ka Digital India kan shaniah ha ki nongpynkylla dur kum ka Rose Angelina ban pynrung ia ka digital kaba kham jylliew ha ki shnong kyndong jong ka ri India.