Ka rukom plie dukan ha ki jaka nongkyndong bad shabar ka sor Shillong

Syllad | The Rising MeghalayaJune 5, 2021

Ka bor synshar district jong ka East Khasi Hills District haka 4 tarik kala pynmih iaka hukum halor ka rukom plie iaki dukan ha ki jaka nongkyndong bad ki shnong kiba don shabar jong ka sor Shillong.

Ia kane ka hukum la pynmih ban pyntreikam iaka jingbthah jong ka Sorkar katkum ka hukum kaba la pynmkih haka 4 tarik u Jylliew, 2021 bad katkum ka mat kaba 11 jong katei hukum kaba ai bor iaki Deputy Commissioner ban peit ia kino ki jait kam ban pyllait na ka jingpynjari naka jingkhang dam ban iakhun pyrshah iaka jingpang khlam COVID-19.

Ka Deputy Commissioner, East Khasi Hills District, Kong Isawanda Laloo kala ong ba ka jingplie ia ki dukan ha ki jaka nongkyndong bad baroh ki jaka kiba hap shabar jong ka Sor Shillong kan sdang naduh ka 7 tarik haduh ka 12 tarik u Jylliew, 2021

Kine ki harum ki long ki jingpynbeit iaka rukom ban plie iaki dukan dukdoh:

Baroh ki dukan kiba die ia ki mar ba donkam, la shah ban plie katkum ka jingpynbeit jong ki Sub Divisional Officers (C) bad ki Block Development Officers ha ki jaka ba ki dei ban peit. Kine ki kynthup ia ki dukan die mar bam, ki dukan die jingbam na bynta ki jingri bad ki dukan die ia ki tiar ki tar lane ki kor kiba iadei bad ka rep ka riang.

Ha ki jaka nongkyndong ha kaba ym don jingshah ktah lane duna jingshah ktah ha u khniang jingpang, la shah shuh ia kine ki dukan harum ban plie ym palat ia ka lai sien shi taiew ha ryngkat ka jingbud pyrkhing ia ki kyndon kumba la kdew harum:

1. Ki dukan ba buh ia ki tiar shna iing shna sem
2. Ka jaka die ne tih maw kiba la don lypa tang na ka bynta ki jingtrei ba la sdang lypa bad ki jingtrei ba iadei bad ka MGNREGA
3. Ki dukan die ia ki tiar shna light, ki dukan die ne shna gas.
4. Ki dukan kiba die/shna ia ki mobile phone bad ki dukan recharge mobile phone.
5. Ki dukan die kali bad ki dukan shna lane die tiar kali.
6. Ki dukan shna tiar furniture (ym shah ia ki karkhana ot dieng)
7. Ki karkhana shna nar (grill)
8. Ki dukan die syntiew
9. Ki dukan stationery bad dukan Xerox

Kiwei kiwei ki dukan ki bym don kyrteng haneng la shah ban plie tang lada donkam palat bad katkum ka jingioh jingbit na ki SDO/BDO kiba dei peit, lyngba ki Rangbah Shnong.

Ki Kyndon:

Ki SDO (Civil) bad ki Block Development Officer ha ryngkat ka jingiabeit lang bad ki Rangbah Shnong, ki CCMT jong ki Zone bapher bapher, kin pynbeit ia ka jingplie ia ki dukan ha kata ka rukom ba kan ym don ka jingialum kynhun jong ki briew ha kano kano ka jaka.

Ki Rangbah Shnong, Ki Market Committee bad CCMT ki dei ban kit khia ba ki briew ki bud ryntih ia ki kyndon ba la buh.

Baroh ki dei ban deng ia ki jain tap khmut tap khmat (3-ply cloth mask) lane ki N-95 khlem pep.

Ka dei ban don ka jingiajngai kumba 2 meter iwei na iwei.

Ki briew kim dei ban iaid kai ha ki jaka iew, khlem kano kano ka jing donkam.

La mana pyrshah ban plie ia ki dukan sha bad ja.

Lada lap iano iano kiba pynkhein ia ki kyndon ba la buh, yn khang syndon ia ki dukan jong ki lane shah dain kuna.

Baroh ki dukan shnong ki dei ban khang ha lane shwa ka por 3 baje janmiet.

La khang pyrshah ban rung sha Sor Shillong khlem ka pass kaba biang. Ia ka jingiaid jong ki kali la aiti ha ki SDO (C)/BDO kiba dei peit ba kin pynbeit.

Kan ym dei ban don kano kano ka jingialum briew ha ki dukan lane ha kino kino ki jaka bad ki paidbah ki dei ban pyndep ia ki jingthied jong ki kloi katba lah ha ka por kaba lyngkot.

Baroh ki dukan ha ki jaka iew ki dei ban khang ha lane shwa ka por 3 baje janmiet.

Lada lap ia kino kino kiba iaid sharum shaneng khlem ka daw ba donkam, yn pynshitom katkum ka ain.