Ka project bording ba heh tam ka Jylla ka Leshka hydro power ka ap iaka jingbit ba khatduh: Mondal

Syllad | The Rising MeghalayaJuly 4, 2025

Ka Leshka Hydro Power Project stage-II, ka project pynmih bording ba 210 MW la khmih lynti ba kan sa ioh lut ia baroh ki jingbit mynta u snem na ka bynta ban sdang pyntrei noh ia ka, ong u Myntri ka Tnad Bording u AT Mondal.

Kane ka project ka la dep ioh lypa 11 na ki 12 tylli ki jingbit kaba kynthup ia ka Environment bad Forest Clearance kiba donkam na ka bynta ban lah ban pyntrei ia kane ka project.

U Myntri u la ong ba ka bynta kaba sah ka dei kaba kham kongsan bad kaba shem jingeh, hynrei u kyrmen skhem ba yn sa lah ban ioh ha kaba kut jong une u snem.

“Ngi dang dang sah satang kawei ka bynta ban ioh lait. Kane ka dei kaba kham shem jingeh bad kaba kham jyrwit jyrwat. Hynrei kyrmen ba ha kaba kut jong une u snem ngin lah ban weng ia kane ka jingeh,” ong u Mondal haba kren sha ki lad pathai khubor haka sngi Palei.

“Hadien ba la ioh lut ia ki jingbit, yn lah ban pyniaid shakhmat ia kane ka project kaba ha ka jingmang tyngka kaba kot kumba T.2100 klur, bad ka ban long ruh kawei na ki project pynmih bording kaba heh tam ha ka jylla,” u la bynrap.

Haba kylli, u Myntri u pyntip ba ka jinglong acid jong ka wah Myntdu ka la kham duna, bad kaba la pynlong ia ka ban lah ban pyntreikam ia kane ka project.