Ka ophis ba thymmai, ki mawjam ba thymmai: Ka San Shnong CLF kala pynlong iaka AGM bad ka khusnam National Award

Syllad | The Rising MeghalayaSeptember 3, 2025

Ka San Shnong Cluster Level Federation (CLF) jong ki Self-Help Group (SHG Multipurpose C/S Ltd), East Jaintia Hills ka la pynlong ia ka jingialang ba shisien shi snem jong ka ha ka haka 1 tarik Nailur haka shnong Mutong ha kaba la wan iashim bynta da ki nongialam kiba dei ki kynthei, ki nongialam shnong bad ki ophisar sorkar.

Ha kane ka sngi la ia don lang ruh u Myntri sorkar uba dei ruh u MLA ka thain u Bah Kyrmen Shylla kum u Kongsan uba ha ka jingkren u la iaroh ia ka rukom buh jingthoh ba ryntih jong ka CLF, ka jingpyniaid beit ia ki kam pisa pilain, ka jingpyniaid ia ki ram ki shah da kaba batai ia ka kum ka nuksa jong ka jingpynkupbor ia ki nongshong shnong.

U la ai ruh ka jingiaroh kaba kyrpang ia ka Cluster Coordinator ka Kong Runita Phawa kaba la trei shitom da kaba kular ruh ia ka jingkyrshan jong ka sorkar na ka bynta ki project ki ban wan jong ka.

Ha ryngkat u MDC ka thian u Bah Lasky Rymbai u MLA u la plie ruh ia ka ophis bathymmai jong ka CLF ha ka shnong Mutong ia kaba la bei lyngba ka MLA Scheme (SRWP), kaba dei ka jingjop ba kongsan ka ban long ka jaka pdeng na ka bynta ka jingiatreilang, ka jingpynkhlain ia ki jingtreikam bad ka jingpynroi ia ki kam ha ki thain nongkyndong.

Na ka liang u MDC u la iaroh ia ka jingkiew jong ki nongialam kynthei na ka thain jong u kiba mynta ki mihkhmat ia ki shnong ki thaw jong ki ha ki jingialang ha ki kyrdan jong ki District bad ki jylla bad ka ri baroh kawei.

U Block Programme Manager (NRLM) Bah K. Lapasam ha ka jingkren u la iaroh ia ka CLF halor ka jingtreikam kaba shai bad khuid bad kaba kiew shaphrang da kaba khot ia ka kum kawei na ki synjuk kaba don jingkyrmen hapoh Wapung Block bad ha East Jaintia Hills District hi baroh kawei.

Na ka liang ki bor pyniaid District la wan iashim bynta da u SDO (Civil) u M. Kumar uba la mihkhmat na ka bynta u Deputy Commissioner, katba u ophisar na ka Tnad Horticulture u Bah Sainbor Dkhar u la pynshlur ia ki nongrep ban ioh ia ki skhim sorkar bad ban pyntreikam ia ki rukom rep kiba neh. 

Ka khyllipmat kaba sngew sarong ka la wan long hadien ba ka Vice President ka Kong Bial Dkhar ka la pynbna ba ka San Shnong CLF ka la ioh pdiang ia ka khusnam National Award ha ka Nongbah New Delhi ha ka 14 tarik Nailar 2024 lyngba u Myntri ka Sorkar Pdeng uba khmih ia ki kam pynroi nongkyndong u Shivraj Singh Chouhan.

Na ka liang jong ka Secretary Nadona Dkhar ka la pynpaw kumno ba ka synjuk da ka jingkyrshan na ka tnad Agriculture bad Horticulture ki la kyntiew ia ka rukom rep kaba khlem pyndonkam dawai bad pynshlur ia kane ka rukom rep lyngba ka sboh eit masi bad ban thung ia ki kynbat jyrngam na ka bynta ki jingri.

Kum shibynta ka jingkyrshan jong ka sorkar, ka CLF ka la ioh pdiang ruh ia ka mashin power tiller, ka mashin ot phlang, ka mashin dung kba na ka ophis ka tnad Agriculture ka ban iarap ban nangpynkhlain shuh shuh ha ki jingtreikam ha ka thain San Shnong.

U rangbah shnong ka Cham Cham u Bah Karlud Dkhar u la pynpaw ka jingsngewnguh kaba khraw ia ka jingïalam jong ka CLF.

Ka CLF kala pynkupburom ruh ia u ma Tyrnit Pdein, General Secretary jong ka 5 Shnong, Mukhaialong, na ka bynta ka jingkyrshan bad jingnoh synniang jong u sha ka jingroi bad jingjop jong ka CLF.

Ia kane ka jingialang la pyniaid da ka president ka CLF ka Iasain Sana bad la ioh ia ka jingkren pdiang burom da ka Doni Phawa. Katba na ka liang ka Secretary Kong Nadona Dkhar ka la batai ia ka jingiaid lynti jong ka Synjuk da kaba pynpaw halor ka jingkynjoh jong ka sha ki 165 tylli ki Self-Help Groups (SHGs) hapoh ki 8 tylli ki Village Organisations (VOs), ba la kyrshan da ki 56 ngut ki nongtrei.

Ha kane ka prokram na ka liang ka president ka la aiti ruh ia ka memorandum sha u Myntri na ka bynta ka Synjuk.