Ka NPP kan wanphai ha ka bor ha KHADC; ong u kyrong ka NPP bad MDC ka Laitumkhrah-Malki

Syllad | The Rising MeghalayaJanuary 28, 2025

U kyrtong ka Seng National People’s Party (NPP) uba dei ruh u MDC ba mynta ka Laitumkhrah-Malki Constituency, u Bah Fatin Joseph Lakadong ha ka 27 tarik Kyllalyngkot u la leit ban thep kyrteng ban iakhun ha kane ka elekshon ka ban wan sha ka Khasi Hills Autonomous District Council (KHADC), ka ban long ha ka 21 tarik u Rymphang 2025.

Ia u Bah Fantin u kyrtong uba la leit thep kyrteng nyngkong eh na ka bynta kane ka elekshon ka ban wan la synran lang da ka kurim jong u kaba dei ruh ka Myntri sorkar Jylla ka Kong Ampareen Lyngdoh nalor ki nongialam bad ki nongkyrshan jong ka party.

Haba kren sha ki lad pathai khubor hadien ba la pyndep ia ka jingthep kyrteng hakhmat u Returning Officer (RO) ha Inter-State Bus Terminus (ISBT), Mawlai-Mawiong, u Bah Fantin uba dei ruh u Executive Member (EM) u la ong ba um shym la iohi satia ba ka jingpyrshah ia ka EC ha KHADC kan treikam pyrshah ia ka NPP kaba ialam ia ka EC hapoh ka Council.

“Kane ka long namar ngi la leh shibun kiei kiei hapoh ka Council. Ngi la pass ia bun tylli ki Bill. Ngi la iatreilang ryngkat ryngkat bad ka Tnad DCA kumjuh bad u Lat ka Jylla. Nga kwah ban ai khublei ia u Lat halor ka jingai jingmynjur halor kiba bun tylli ki Bill kiba la sahteng,” u la bynrap.

U Bah Fantin u la ong ruh, “Ym kumba long ha JHADC bad GHADC, haduh mynta hapoh ka KHADC ka jong ngi, kam ju don ka jingpynsahteng ia ka tulop.”

Haba pynpaw ia ka jingsngew skhem ba ka NPP kan wanphai biang ha ka bor ha KHADC, u Bah Lakadong u la ong, “Ngi don ka jingshaniah kaba skhem ba ngin thaw ia ka EC kaba thymmai.”

“Baroh ki MDC ba mynta ki la leh ia la ka jong ka bynta bad ki la trei shitom khnang ba baroh kiei kiei kin iaid beit iaid ryntih. Ki la don na ka bynta u paidbah bad kumta nga don ka jingngeit kaba pura ba baroh ki kyrtong jong ngi kin ioh ia ka jingjop,’ bynrap u Bah Fantin.

Haba kren halor kiwei ki mat, u Bah Lakadong u la ong ba un pynthikna ba ka ktien Khasi kan long ka ban shim kongsan (compulsory) ha ki jingpule ha ki kyrdan primary.