Ka North Liberty HSS ka Over All Champion haka Inter School Athletic Meet u DSO Jowai

Syllad | The Rising MeghalayaMay 13, 2022

Ka Norh Liberty Higher Secondary School kala ioh rah iaka nam Over All Champion hadien ba kala ioh khur 17 tylli ki takma ksiar haka lympung ialehkai District Level Inter School Athletic Meet 2022 kaba pyniaid da u District Sports Officer, West Jaintia Hills District ha ryngkat ka jingiatreilang bad ka West Jaintia District Sports Association (WJDSA) kaba la poi sha kaba kut ha Kiang Nangbah Stadium haka sngi Thohdieng.

Ka North Liberty kala ioh khur iaka nam Best Team haka Under-14 Boys bad Girls. Na ki shynrang kala khur 2 ki takma ksiar bad mar kawei ka takma rupa bad rnong. Na ki kynthei mar 2 tylli ki takma ksiar bad rnong bad kawei ka takma rupa.

Haka Under 16 Girls ruh ka North Liberty kala khur 3 takma ksiar, 1 rupa bad 3 rnong. Na ki Boys’ pat ka Govt. Higher Secondary School kala khur 7 takma ksiar, 2 rupa bad 3 ki rnong.

Haka Under 18 pat ka Govt. Boys’ HSS kala khur 6 tylli ki takma ksiar, 3 takma rupa, 2 ki takma rnong, katba na ki kynthei ka Kiang Nangbah Govt HSS kaba la iashimbynta haka sien kaba nyngkong eh kala khur 4 tylli ki takma ksiar, 5 tylli ki takma rupa.

Ka khusnam Best Athlete, ka North Liberty Higher Secondary School ka la ïoh haka kyrdan Under-14 Boy’s bad kyrdan Under-18 Boys. Haka Under-14 Boys la ioh rah da Adrick-Da-e-mitre Pathaw ula ïoh khur kawei ka takma ksiar bad rupa haka Longjump 60mtr. Haka Under-18 Boys u Sajemiki Shylla ula ïoh artylli ki takma ksiar haka jingïamareh kaba 100mtr bad 200mtr.

Katba ka Government Boys Higher Secondary School kala ioh khur Under-16 Boys hadien ba u Ïoh-i-Ksan Lyngdoh ula ïoh artylli ki takma ksiar haka 100mtr bad Shotput.

Ka JNV Mukhla ruh ka la ïoh ïaka nam Best Athlete haka kyrdan Under-16 Girls bad Under-18 Girls hadien ba ka Aroma Lyngdoh haka Under-16 kala ïoh khur artylli ki takma ksiar haka jingïakop mareh kaba 100 bad 300mtr. Haka kyrdan Under-18 Girls ka Rideimaia Pasi kaba la ïoh khur artylli ki takma ksiar haka Shot put bad Dissuss Throw.

Katba ka Ham Myllin Phawa na ka Jowai Government UP RMSA ka la ïoh ïaka nam Best Athlete na ka Under-14 girls hadien kala ïoh khur kawei takma ksiar bad takma rupa haka 600mtr bad 60mtr.

Hashwa ban sam ïaki khusnam sha baroh ki lahduh ha kane ka lympung, kala don ka jingïalang bad la ïoh ka jingkren lyngkot na u DSO ka West Jaintia Hills District u Khroobok Passah bad u Patrick Lamare Vice President WJDSA haka jingïadonlang ki nongkitkam WJDSA bad ki nonghikai na ki skul bapher bapher.

Ïaka nam ‘Best Discipline School’ la ïohrah da ka St. Micheal & All Angels Secondary school, Jowai.