Ka North Liberty HSS bad ka Govt. Boys kin mihkhmat iaka West Jaintia Hills sha ka State Level Subroto Mukherjee Cup

Syllad | The Rising MeghalayaJune 13, 2025

Ka North Liberty Higher Secondary School (NLHSS) bad Govt. Boy’s Higher Secondary School, Jowai kin pynkhreh ban mihkhmat iaka district West Jaintia Hills shaka lympung ialehkai State Level Inter School Subroto Mukherjee Cup Football Tournament ka ban long ha nongbah Shillong.

Kane kala wan long hadien ba ka NLHSS kala rah iaka nam lahduh ha baroh ar tylli ki kyrdan haka Under-17 Boys’ bad Girls’ katba ka Govt. Boys’ HSS haka Under-15 haka jingialehkai final kaba long ha Kiang Nangbah Stadium kaba long ha ka 13 tarik Jylliew.

Ia kane lympung ialehkai ki khynnah skul ka District Level Inter School Subroto Mukherjee Cup Football Tournament la pyniaid da ka ophis u District Sports Officer West Jaintia Hills.

Haba phai jingialehkai ki kynthei haka Under-17, ka North Liberty HSS kala pynliem da 2-0 iaka Kiang Nangbah Hr. Secondary School, katba na ki shynrang ka North Liberty Hr. Secondary School kala jop da 1-0 iaka Marian Hill HSS.

Haka kyrdan Under 15 Boys’, ka Govt. Boys’ HSS kala jop da ka tie breaker da 3-2 iaka St. Dominic Hr. Secondary School. Haka jingiakhun haka por kaba la buh kine ki ar liang mamla kila iakhaid mar 1-1 kol

U MLA ka Jowai Ma Wailadmiki Shylla, Chairman MUDA uba long kum kongsan haba kren ula ai mynsiem iaki khynnah skul khamtam kiba ioh ban khur iaka nam lahduh ban nang ialehkai. Ula kular ba lada don ka skul kaba ioh mihkhmat na ka District sha ka National Level un synniang shi lak tyngka.

Ha kaba iadei bad ka jingpynbha pynmiat iaka Kiang Nangbah Stadium naka bynta ka National Games, ula pyntip ba naka liang ka sorkar kan leh noh ia kaba donkam ha kine ki khyndiat sngi ban wan bad ula pyntip ruh ba ka sorkar kala buh thong ban tei sa kawei ka madan artificial turf haka shnong Mukhla.

Iaki khusnam sha ki nongjop la sam da u Ma James Sutnga, President EJHDSA, u Ma Alan Niangti, President WJHDKDA, Ma Patrick Lamare, Vice-President, WJDSA, Ma Kmenlang Shylla, President Thadlaskein Sports Association, Ma EMH Passah, Working President WJDSA bad Ma Khroobok Passah, Joint Director Directorate of Sports & Youth Affairs, ka sorkar jylla.