Ka North Garo Hills ka lahduh haka State Level Chief Minister ISAM 2022

Syllad | The Rising MeghalayaJune 2, 2022

Ka lympung bah ialehkai athletic ki skul ka jylla ba  tip ia ka kum ka State Level Chief Minister Inter School Athletic Meet  2022 ka la poi noh sha kaba kut mynta ka sngi Palei jong ka taiew, bad ha kaba kut jong ka sngi, ka nam lahduh la ne overall champion la ioh ban rah ia ka da ki khynnah skul jong ka North Garo Hills District.

Ha lyndet ka jinglah ban ioh rah ia kane ka nam ba khraw tam jong kane ka lympung ia ka kynhun ialehkai ka North Garo Hills District ka la wan hadien ba ka ki rang bad thei ialehkai jong kane ka distrik, naduh ka sngi ba nyngkong ka jingwan ban iashim bynta ka jong ki sha kane ka lympung, la lap bad iohi shai kdar ia katta ka jingkut jingmut, ka jinglen lade bad aiti met bad mynsiem jong baroh ki nongialehkai ha baroh ki jait jingialehkai kampher lada dei ha ka liang ka track ne ka field event.

Ha kaba kut jong ka sngi, u soh ka jingtrei shitom ia kane ka kynhun ka wan ba kan mih paw da ka jinglah ban ioh ban khur  11 tylli ki takma ksiar, 6 tylli ki takma rupa bad 5 tylli ki takam rnong, kaba la biang pura ia kane ka kynhun ym tang  ba kin shad kmen ia la ka jong ka distrik, pynban kan dei ka burom kaba khraw bad ka sngi kaba kmen naka bynta baroh ki khynnah skul jong ka dong bad ka thain ka ri lum Garo, namar ba ka nam lahduh ha kum kane ka lympung bah ialehkai ka dei kaba la  ioh ban rah ia ka hadien bun bun tylli ki snem, kaba lada shu iakren hi ka long ba ha kum kane ka lympung bunsien ki nam lahduh dei ba khur ia ki da ki rang ne thei ialehkai ki skul jong ki diostrik ka Ri Lum Khasi bad Jaintia, kumka Ri-Bhoi, East Khasi, Jaintia Hill.

Lada phai pat sha kiwei kiwei pat ki khusnam nam jop ba la sam ha kane ka sngi ba kut jong kane ka lympung bah ialehkai ka long ba lada phai sha ka liang ki khynnah kynthei, ka nam  jop ka leit sha ki khynnah skul jong ka West Khasi Hills District hadien ba ki la ioh ba kin khur 5 tylli ki takma ksiar bad mar kawei ka takma rupa bad rnong bad kaba wan ba-ar pat dei ki khynnah skul jong ka  Ri-Bhoi District hadien ba ki la ioh ba kin khur  4 tylli ki takma ksiar, 7 tylli ki takma rupa bad 8 tylli ki takma rnong.

Lada yn ia phai pat sha ka liang ki khynnah shynrang ka nam jop na kane ka kynti iakob jong ka ISAM la rah ia ka da ka North Garo Hills District hadien ba ki la ioh ba kin khur  8 tylli ki takma ksiar, 4 tylli ki takma rupa bad 3 tylli ki takma rnong bad ka kynhun ba wan ha ka kyrdan kaba ar dei ka East Khasi Hills District kaba la ioh ba kan khur  6 tylli ki takma ksiar bad mar kawei ka takma rupa bad rnong.

Shuh shuh ha kane ka sngi ba pynkut ka la don  ruh ka jingsam ia ka khusnam nongialehkai ba kynsai tam bad lada phai sha ka kyrdan jong ka U-14 na ka liang ki kynthei ka nam nongialehkai ba kynsai  la rah ia ka da ka Rosy Sana jong ka East Jaintia Hills District, kaba la ioh ba kan khur haduh  591 point hadien ba ka la ioh ba kan khur  kawei ka takma ksiar ha ka iakob mareh kaba  600 meters, na ka liang ki shynrang ia kane ka nam la rah ia ka da u Henry Yoga A Sangma ka North Garo Hills District, uba la ioh ban khur artylli ki takma ksiar ba la wan lyngba ka iakob mareh kaba 60 bad 600 meter.

Ha ka kyrdan iakhun ka U-16 ka nam nongialehkai ba kynsai na ka liang ki khynnah kynthei la rah ia ka da ka Phibakmen Rynghang  Ri-Bhoi District hadien ba ka la ioh ba kan khur 640 point hadien ba ka la khur kawei ka takma ksiar na ka iakob mareh ba 100 meter bad na ka liang ki shynrang ia kane ka nam la rah ia ka da u Anilson Ch Marak ka South Garo Hills District uba la ioh ban khur 651 poin hadien ba u la khur ia kawei ka takma ksiar na ka long jump.

Ha ka kyrdan iakhun ka U-18 ka Ibaihun Kurbah ka Eastern West Khasi Hills Distict ka la ioh ba kan khur ia ka nam best athlete  kaba la ioh khur 1262 points hadien  ba ka la ioh ba kan khur ia ki artylli ki takma ksiar ba la wan lyngba ka iakob mareh kaba 100 bad 200 meters , katba na ka liang ki khynnah shynrang u Donbok Shabong ka East Khasi Hills District u la ioh ban rah ia kane ka nam hadien ba u la ioh ban khur 1638 point hadien ba u la ioh ban khur ia ka takma ksiar na ka iakob mareh kaba 200 & 400 meters.

Kongsan ba la wan ban iadon lang ha kane ka sngi dei u SP (City) EKHD u bah Vivek Syiem (IPS) ryngkat ka jingiadon lang u working president bad General Secretary ka Meghalaya State Olympic Association u bah John F Kharshiing bad bah Finely L Pariat nangta u bah George E. Lyngdoh DSO  ba la shongthait ka jylla, ki op0hisar bad ki DSO ka tnat Directorate of Sports & Youth Affairs bad kiwei kiwei.