Ka Meghalaya kan tih iaka lawei bathymmai: Plie iaka jingtih dewiong stad saian ba nyngkong eh

Syllad | The Rising MeghalayaMarch 18, 2025

Ka jylla Meghalaya kan sdang noh ba kan tih iaka lawei kaba thymmai da ka juk jingstad saian ne ‘Scientific Mining’ ia u dewiong ka ban pyntreikam nyngkong eh ha ka jylla ha Saryngkham-A’ Coal Mine, Byndihati, East Jaintia Hills District. Ia kane kam tih dewiong thymmai la plie paidbah da u Myntri Rangbah ka Jylla u Conrad K Sangma ha ka 17 tarik Lber lyngba ka video conferencing.

Kane ka jingtih dewiong lyngba ka juk stad saian ka la pynkut noh ia ka jingtih dewiong thliew khnai kaba la shah khang pyrshah ha ka NGT naduh kine ki palat 10 snem ba la dep.

Ha kane ka prokram la ia don lang ki Myntri sorkar kiba kynthup ia u Bah Kyrmen Shylla, ka MLA ka Sutnga-Saipung ka Kong Santa Mary Shylla, u Executive Member, Jaintia Hills Autonomous District Council (JHADC), u Bah Hambertus Nongtdu, Deputy Commissioner, East Jaintia Hills District, u Shivansh Awasthi, u Superintendent of Police ka district, u Giri Prasad nalor kiwei pat ki nongshah khot sngewbha bad ki paidbah nongshong shnong ka thain.

U CM haba aijingkren ha ka jingialang u la ai khublei ia baroh kiba don bynta ha kane ka kam kaba kynthup ia ki ophisar, ki trai par, ki nongaplai na ka bynta ka kam tih dewiong, u trai ka par dewiong u Bah Dapmain Shylla na Byndihati kiba la noh synniang ban pynurlong ia kane ka kam tih dewiong lyngba ka juk saian ha ka Jylla, da kaba pynpaw ruh ba kine ki 10-11 snem kiba la leit noh ki dei ki snem kiba la wanrah ia ka jingeh kaba khraw ia ki nongshong shnong ka jylla khamtam ia kito kiba don bynta ha ka kam tih dewiong bad kaba la ktah jur shisha ha ka liang ka kamai kajih bad ka ioh ka kot.

U Conrad u la pynkynmaw ruh ba ha u snem 2018 ha ka por ba u la shimti kum u Myntri Rangbah ha ka sien kaba nyngkong eh ban ialam ia ka sorkar MDA, ka mat kaba iadei bad ka kam tih dewiong ka dei kaba hakhmat eh jong ka sorkar bad lyngba ka jingtrei shitom ha kine ki hynriew hynniew snem ba la dep, mynta kine ki la long kiba seisoh lyngba ka jingsdang ia ka Scientific Mining Coal Block kaba nyngkong eh ha ka jylla Meghalaya.

“Ka jingiaid lynti kam shym la long kaba suk. Ka jingiaid lynti kam shym la long ruh kaba shai.Ha ka jingshisha ka long kum ka jingiaid ha ka jaka kaba ym lah ban tip ia ki jingeh ki ban wan hakhmat jong ngi katba ngi dang iaid shakhmat, kaei kaba pynlong ba ngin bteng ban jam shakhmat ka long ban iohi ba ki jingeh kiba ki briew jong ngi ki iakynduh ngi dei ban wad ia ki lad ki lynti ban weng bad pynbeit noh ia ki bad ban wanrah ia ka jinglong jingman ka ban biang na ka bynta ki briew bad ki nongshong shnong ki jong ngi, bad kane ka dei kaba la ai mynsiem ba ngin iaid shakhmat,” u la ong.

Nalor kata u la ong ruh ba ki sienjam ki ban pynthikna ba kiwei pat kiba aplai ban ioh jingbit ha ka kam tih dewiong katkum kane ka juk saian ka la iaid shakhmat. “Ka long barabor kaba kyllain bad jingiakynduh jingeh na ka bynta kito kiba nyngkong, ba ar ne kiba lai namar ki hap ban iaid ha ka lynti kaba kim pat ju mad, kim tip satia ia ki jingeh kiba lah ban mih kynsan bad kaba lah ban pynslem ia kane ka sienjam, hynrei mynta la don kiba la iaid shakhmat bad sakhi ia kiei kiei baroh.Mynta kan long kaba kham pynsuk na ka bynta kiwei pat kiba bud nadien ba kin jam shakhmat namar la dep ban kdew lynti na ka bynta jong ki, ki la lah ban plie lynti bad pyni ia kiwei pat ba kane ka dei kaba ngi hap ban bud ia ki kyndon,” ong u Conrad.

Shuh shuh u la ong ruh ba ka Meghalaya ka la mad ia kiba bun ki jingeh, kata nalor ka phang kaba iadei bad ka teknologi, ngi don ruh ia ki hok halor ka khyndew ka shyiap bad ki ain bat khyndew kiba iapher na kiwei pat ki bynta jong ka ri, bad kumta ruh ki don bun ki kyndon, ki jingeh bapher bapher kiba la mih kaba la pynlong ia ngi ba ngin shim por ban pynurlong ia kane ka kam tih dewiong.

Na ka liang ka MLA ka Sutnga Saipung ka Kong Santa Mary Shylla ha ka jingkren ka la ai khublei ia u Myntri Rangbah ka Jylla namar hapoh ka jingialam ka jong u ba la lah ban pynurlong ia kane ka kam tih dewiong lyngba ka juk stad saian hapoh ka Jylla bad pynpaw ruh ka jingkyrmen ba ka jingphohsniew ban pynurlong ia ka thong jong ka ioh ka kot ka ban kynjoh sha ka 10-billion-dollar hapoh jong u snem 2028 hapoh ka jingialam ka jong u.

Kiwei kiwei kiba la aijingkren ha kane ka prokram ki kynthup ia u MDC ka JHADC u Bah Hambertus Nongtdu, Deputy Commissioner ka East Jaintia Hills District u Shivansh Awasthi bad MLA barim ka Khliehriat u Bah Justin Dkhar.