Ka Lungchun Khur ha Meghalaya ka krem kaba 10 na kiba jrong tam hapoh ka ri India

Syllad | The Rising MeghalayaMarch 16, 2025

Ka Meghalaya ka la sakhi shuh shuh ha kaba iadei bad ka jingdon ia ki krem ki kroh kiba jrong bad kiba itynnad da ka jinglapdien ia ka Lungchun Khur ia kaba la pynthikna ba ka dei kaba wan ha ka kyrdan kaba 10 napdeng ki krem kiba jrong tam ha ka ri India, bad ha ka kyrdan ba 9 kum ka krem mawshun kaba jrong tam ha India, kata kaba don ia ka jingjrong kaba haduh 13,618 mitar.

Kane ka jinglapdien ka la wan long ha ka por ba la pynlong ia ka jingleit rung ia ki krem ki kroh ba la tip kum ka Abode of the Clouds Expedition 2025, ba la pynlong da ka kynhun ki nongrung krem na bar ri kumjuh na India ia kaba la khot pynlong da ka Meghalaya Adventurers Association (MAA) naduh ka 2 haduh ka 28 tarik u Rymphang ba la dep.

Ha kane ka jingleit rung krem ka kynhun ka la lah ruh ban rung bad thew ia ki krem kiba jrong haduh 22,663 mitar kiba ym pat shym la lapdien ne rung mynno mynno ruh, kata da kaba pynleit jingmut ha kaba iadei bad ki krem mawshun jong ka Byrong, Jongria, bad ka Muallian Spur ne ki lumbah ka shnong Muallian kaba hap ha Saipung Block, East Jaintia Hills District.

Ka Lungchung Khur ka dei kaba don hapoh jong ka Muallian Spur kaba don ia ki lynti wah kiba heh kiba don shapoh khyndew, ha kaba katto katne ki dei kiba poi haduh 30 mitar ha ka jingheh bad ka jingkynjang ha ryngkat ka jingdon ia ki maw bad kiwei pat ki jingdon jingsap kiba wandur itynnad bha.

Ha ka thain Byrong jong ka Wahlong ha East Khasi Hills, ka kynhun ki nongrung krem ka la shna map na ka bynta ki phra tylli ki krem bad kaba la noh synniang ha ia ki lynti iaid krem ba thymmai kiba jrong kumba 6,210 mitar. Napdeng ki jingshem kiba kongsan ki long ka Krem Riblai (1,973 mitar), ka Krem Khla (1,521 mitar bad ka Krem Wallang (1,393 mitar).

Kumjuh ruh ka jingwad bniah ha ka shnong Jongria kaba kynthup ia 27 tylli ki krem ha ka thain wah Pongkoloi kaba la tip ruh kum ka Kshaid Wah Khangban bad ka Kshaid Litang. Kiwei pat ki jingshem ki kynthup ia ka Canyon Sink 938 mitar, ka Lizard Splat, ki krem Honeycomb bad ka krem Soh Shrieh System kaba ka kdew halor ka jinglapdien ia ki 13 tylli ki jinglapdien ia ki kynja thliew (blind shafts) kiba jylliew kumba 8 haduh 26 mitar. La nangkyntiew ruh ia ki jinglap lyngba ki krem kiba la dep rung teng kum ka Um Sngad Sink bad ka krem Pakse.

Kane ka jingwad bniah ka la pynleit jingmut ruh ha kaba iadei bad ki jingpyrshang ban pynneh pynsah, kata da kaba iatreilang bad ka Tnad Fisheries ka sorkar Meghalaya ban lum ia ki nuksa jong ki jait dohkha krem ba matlah kiba heh tam ha ka pyrthei ia kiba la tip kum ki Neolissochilus pnar na ka krem Um Ladaw. Ia kine ki jait dohkha kiba don ia ka jingheh kaba 30 cm la bteng ban pynlong ia ka jingpule bad wad bniah na ka bynta ban pynneh pynsah.

Lyngba kine ki jinglapdien kiba thymmai, ka jingjrong jong ki krem ba la buh jingthoh ha Meghalaya ka la kynjoh sha ka 573.6 kilomitar. Watla katta ki riew shemphang ki don ia ka jingngeit ba ki dang don bun ki krem ki kroh ia kiba kim pat lah ban lapdien. Ka jingjurip ba kyrpang ha South West Khasi Hills naduh ka 3 haduh ka 14 tarik u Kyllalyngkot ba la dep kala pyntam ia ka jingthew kaba kila rung mynshuwa kaba long 1564 mitar ha krem Amarsang.

Na ka liang u General Secretary ka MAA u Bah Brian D Kharpran u la pynpaw ka jingsngewnguh ia ki nongshong shnong, ki tnad sorkar bad ki riew shemphang na ki ri ka pyrthei kiba la don bynta ha kaba iadei bad kane ka phang. U la ban jur ruh ba ka Meghalaya ka dang iai long ka nonglamkhmat ha ka pyrthei ha ka jingwad  bniah ia ki krem ki roh ha kaba la dep ruh ban pynkhreh lypa na ka bynta ki jingwad bniah kiba bud.