Ka Jylla Meghalaya ka jaka pdeng ka pule puthi kan kylla sha ka kam khalai

Syllad | The Rising MeghalayaMay 26, 2022

“Baroh shi katta ïaka Jylla Meghalaya la tip ïaka kum ka ‘Hub of Education’ ne ka jaka pdeng ha baroh kawei ka thain shatei lam mihngi ba ki samla ki wan beh ban pyndep ïaki jingpule bapher bapher, hynrei mynta ka sorkar MDA ka thmu ban pynkylla noh sha ka jaka pdeng ka kam khalai ne Gambling Hub,” la ong u president MPCC u ma Vincent Pala.

U Ma Pala uba long ruh u MP Lok Sabha, ula ong ia kane haka jingkren paidbah ban pynbna ia u kyrtong Congress na Nartiang bad pynrung dkhot ka Nartiang Block Congress Committee kaba long haka sngi Balang ha Namdong. Une u kyrtong ka Congress u dei u Ma Emlang Laloo.

U Ma Pala ula ther tyngeh ia ka sorkar MDA kaba la pynhiar dor ïaka pule puthi ka jylla bad ula ong ba “mynta ka pule puthi haka Jylla Meghalaya kala ïaryngkat dor bad ka Jylla Bihar.”

“Haka por ka jingsynshar ka Congress, ïaka Jylla Meghalaya la tip ïaka kum ka ‘Hub of Education’ ne ka jaka pdeng ka pule puthi, kaba ki samla na kylleng ka thain shatei lam mihngi ki wan hiar sha Shillong ban pyndep iaka jingpule haki kyrdan bapher bapher, hynrei mynta kila leit pule sha kiwei kiwei ki jylla.”

U Ma Pala ula kynthoh ba ka sorkar MDA kam shym la buh ïaki rehabilitation center na ka bynta ki samla bala ngat ha kyrni u drok bad kyiad. Ula kynthoh ruh ïaka jingkiew dor ka kyiad, kaba mynshwa haka jingsynshar ka Congress ka long tang 20 tyngka shi klong lane 50 tyngka shiklong hynrei mynta la pynkiew arshah.

Ula kynnoh ruh ba ka sorkar MDA ka lute im im peit, ha kaba la don kata ka kynhun jong ki “High Level’ kiba pyllait trok 1000 tylli haka shi miet bad ha kawei pa kawei ka trok ki shim 1.25 lakhs bad katkum ka jingkheiñ jong u, ki kamai 12 klur tyngka haka shimiet khlem da ïakren ïaki kam contractor, ka kam thung kam thung jam bad u khaw jong kiba duk.