Ka jingtyrwa siew tulop ka Sorkar ia ki nongtrei ADC ka thmu ban pyllait na ka jingkhyllem: Paul Lyngdoh

Syllad | The Rising MeghalayaAugust 29, 2025

U Nongialam ka United Democratic Party (UDP) uba dei ruh u Myntri Sorkar u Bah Paul Lyngdoh ha ka 28 tarik Nailar u la ong ba ka jingtyrwa ba dang shen jong ka sorkar ban siew hi noh ia ka tulop ia ki nongtrei ki District Council ka dei ka plan ban pyllait ia ki Autonomous District Council (ADC) ha Meghalaya na ka jingkhyllem namar ka jingtyrkhong pisa.

Katkum ka jingong ka jong u, ka jingtyrwa jong ka sorkar kam dei satia ka blank cheque, hynrei ka dei ka jingkyrshan da ka kyndon kaba donkam ia ki ADC ba kin wanrah ia ka jingpynkylla ha ka rukom treikam.

Ka sorkar jylla ka la thaw ia ki lai tylli ki sub committee ban iakren bad ka GHADC, KHADC bad JHADC halor ki jingtyrwa ban wanrah ki jingpynkylla ha ka rukom pyniaid ia ka pla tyngka kaba kynthu ka jingsiew ia ka tulop sha ki nongtrei bad ban aiti ia ka kaiphod hapoh ka 45 sngi.

“Ka long kaba kongsan ban pyniapher hapdeng ka jingai pisa da ka mon sngewbha bad kaei kaba dei ban leh. Ha kane ka bynta, kaei kaba ka sorkar ka tyrwa ka dei ka plan ban iarap pisa ban wanrah jingkylla namar artylli na kine ki ADC ki la hap ban iaksaid ha ka liang ka pisa tyngka. Lada ki dang iaid ha kane ka juh ka lynti jong ka jingtreikam bad ka jingpynmih khajna na ka jingbun palat ki nongtrei, kin sa khyllem noh tang hapoh lai ne saw snem. Kumta shwa ban poi ha une u pud, kane ka dei ka jingtyrwa ba phin wanrah ka jingkylla. Na ka bynta kane ka jingkylla ngi la ai ka jingkyrshan ia phi ha ka liang ka pisa tyngka,” ong u Bah Paul haba kren sha ki lad pathai khubor.

U Bah Paul u la ong ruh ba ka sorkar ka la tyrwa ban kyrshan pisa ia ki ADC bad na ka liang ka jong ki kin hap ban pynbeit ha kaba iadei bad ka jingdon ki nongtrei, ban pynkhlain ia ka jingpynmih pisa bad ban pyntreikam ia kiwei pat ki jingpynkylla ba donkam.

Nalor kata u la pyntip ruh ba ki don napdeng ki ADC kiba la don bun palat ki nongtrei, ha kaba kawei na kine ki Council ka la don haduh palat 1500 ngut ki nongtrei.

U la ban jur ba ka jingkyrshan jong ka sorkar ka dei kaba don ki kyndon ia ki ADC ba kin shim ia ka sienjam kaba dei ban wanrah ia ka jingpynkylla ha ka rukom treikam bad ka jingpynmih pisa.

“Nga iai ban ba ka dei ka sienjam kaba biang eh ba la shim da ka sorkar jylla namar phi tip ba baroh ki ADC ki ju shaniah ia ka jingkyrshan ba ka sorkar jylla ka ai ha ki kum ka jingsam ia ka bhah khajna na ki marpoh khyndew kum ka nuksa. Ngi donkam markylliang bad ha kane ka kam haba ngi iohi ba ki ADC ki la jan poi sha u pud ban khyllem, ngi kwah ban tyrwa sha ki ia ka jingim bad kane ka dei ka jingim kaba ka sorkar ka tyrwa,” ong u Bah Paul.

U Myntri u la pynpaw ruh ba ka jingthmu jong ka sorkar ka long eh halor ka jingpynbeit ia ka jingthung nongtrei bad ban pynthikna ba ki ADC kin don ia ka pla tyngka kaba biang.

Nalor kata u la niew ruh ia kane ka sienjam ba la shim da ka sorkar kum ka lynti kaba bha bad iaroh ruh ia ki jingthmu ban pynkylla dur ia ki ADC.

Katkum ka jingong ka jong u, ka sorkar kam lah ban shu shong kli kti bad shu peit ba ki ADC kin khyllem, bad kane ka plan ban iarap bei tyngka ka dei ka sienjam kaba donkam ban khanglad ia kum kane ka jingmih.