Ka jingslem pyntreikam ILP kam dei ban khanglad ia ka jingwan ki kam pynroi sha ka Jylla: Kyrmen Shylla

Syllad | The Rising MeghalayaJuly 1, 2025

U Nongialam ka United Democratic Party (UDP) uba dei ruh u Myntri Sorkar, u Bah Kyrmen Shylla haka 30 tarik Jylliew u la ong ba ka jingslem ban pyntreikam ia ka Inner Line Permit (ILP) kam dei satia ban khanglad ia ka jingwan jong ki kam pynroi shapoh ka jylla.

U la ong ba ka Iingdorbar thaw ain ka Jylla da kawei ka sur ka la mynjur ia ka rai ban kyntu ia ka Sorkar Pdeng ba kan pyntreikam ia ka ILP ha Meghalaya, hynrei na ka liang ka Sorkar Pdeng kam pat shym la lah ban pyntreikam ia ka.

U Bah Kyrmen ula ban jur ba ki kam pynroi ki dei ban iaid shakhmat bad dei ban ioh ia ki jingmyntoi, kata khlem da khein ia kata ka kyrdan kaba iadei bad ka ILP.

U la ai jingmut ruh ba ym dei ban pyniasoh lang ia ka mat ILP bad ka jingtyrwa ban wanrah ia ka lynti rel.

“Lada ki ai ia ngi ia ka ILP ruh bad lada ngi sngew ba ka rel kam long kaba bha na ka bynta jong ngi namar kan knieh noh ia ka hok jong ngi, kumta ruh balei ngin donkam rel?..Ngim dei ban pyniasoh lang ia kine ki artylli ki mat,” ong u Bah Kyrmen.

U Myntri u la ong ruh ba ka Land Transfer Act bad ka Sixth Schedule jong ka Riti Synshar ka Ri India ki la ai lypa ia ki lad jingiada kiba biang na ka bynta ki paidbah ka jylla.

U la kdew nuksa halor ki briew ki bym dei ki riewlum kiba la hap ban mih noh na ka jylla hadien ka jingkhang tih dewiong jong ka NGT ha u snem 2014 namar ka jingbym lah ban thied jaka.

Haba kylli, u Bah Kyrmen u la ong, “Kiba bun ki jaka kim don ia ka ILP hynrei ki don ia ki lynti rel. Ka long kaba bha palat lada ioh ia ka ILP. Nga la dep ban kdew ba ka long kum ka por tlang, phi phong ka shirt, phi phong ka coat, hynrei lada phi phong sa ka overcoat nalor kine phin sngew syaid shuh shuh bad lada phim phong ia ka overcoat ruh tang ka coat ka la biang hi phi dang lah ban iaksaid. Ka syriem kumta. Kum ki briew ngi kwah ia ki lad jingiada kiba kham biang, hynrei kaei kaei kaba ngi la don mynta, kata ka la biang hi.”

U Bah Kyrmen u la ban jur ruh ia ka jingdonkam ban iamir jingmut lang bad ki paidbah ha kaba iadei bad ki project lynti rel hapoh Rilum Khasi bad Jaintia.

“Ki briew ki dawa ba (ka jingpynlong ia ki jingiamir jingmut paidbah halor kane ka mat). Ki la ong ailad ia ngi ruh ba ngin pynpaw ia ka jingsngew ka jong ngi. Kata ka dei ka sur jong u paidbah.,” u la bynrap.

U la kynthoh ruh ia ki party liang pyrshah halor ka rai ban ym iashim bynta ha ka jingialang jong ka All Party Committee ban iamir jingmut halor ka mat kaba iadei bad ka lynti rel, da kaba ong ba ka jingbym iashim bynta i kumba ka pynpaw ia ka jinglong pdeng ka jong ki bad ka jingbym don bynta.

“Ka jingbym iashim bynta ka mut ba ki long pdeng ba kam long kaba itynnad. Lada phi pyrshah ne kyrshan phi dei ban iashim bynta namar da kaba iadon lang ha ka rynsan iatai phi lah ban ai ia ki jingmut ki jong phi,” ong u Myntri.

Nalor kata u pyntip ba ka UDP kan iamir jingmut halor ka mat kaba iadei bad ka lynti rel hashwa ban leit iashim bynta ha ka jingialang jong ka All Party Committee, ong u Bah Kyrmen.