Ka jingshah pyniap u Raja Raghuvanshi: Kurup ka SIT ia ka pistol bad pisa T.50,000

Syllad | The Rising MeghalayaJune 25, 2025

U Superintendent of Police ka East Khasi Hills, u Bah Vivek Syiem haka sngi Balang u pyntip ba ka kynhun Special Investigation Team (SIT) ka la ioh ban kurup ia kawei ka pistol shna hi (country made) nalor artylli ki magazine bad 2 tylli ki kuli .32 na kawei ka wahduid. 

“Kane ka jingioh kurup ka la wan long lyngba ka jingialam lynti da uwei uba la shah kynnoh donkti u Silome James uba la shah kem noh namar ka jingpynjulor ia ki sakhi satar kiba kongsan kiba iadei bad ka jingjia shah pyniap jong u nongwan shangkai na Indore u Raja Raghuvanshi ha ka thain Sohra,” u la ong.

Nalor kata ka kynhun SIT ka la ioh ruh ban kurup ia ka pisa T.50,000 na ka kali i10 kaba don ia u nombor MP09WG 2352. Ia kane ka pisa la lap na ka pla laptop kaba dei jong u Raj kaba la shah thang.

“Ia kane ka laptop la ong ba la bret noh ha kawei ka lynti surok bad ia kaba ym pat shym la lapdien satia,” bynrap u SP.

U Bah Vivek u la pyntip ba ia u Silome uba dei u nongdie iing bad jaka bad uba la ai wai ia kawei ka iing (flat) sha u Vishal Singh Chauhan, uwei napdeng kiba la shah kynnoh donkti hakhmat eh halor kane ka jingjia kam pyniap lem bad arngut kiwei pat, kata u Balia Ahirwar uba dei u nongap pahara jong ka complex kaba don ia kane ka flat bad u Lokendra Singh Tomar uba shong ba sah ha Gwalior Madhya Pradesh uba dei ruh u trai jong ka flat ha Dewas Naka, ka jaka ha kaba ka Sonam Raghuvanshi kaba shah kynnoh donkti hakhmat eh ha katei ka kam pyniap ka shong ka sah ha ka por ba ka dang phetrieh ha Indore yn wanlam sha Shillong lashai ka sngi Palei na ka bynta ban pynlong shuh shuh ia ka jingtohkit.