Ka jingkiew ïinglieh ïingsaw kadei ka jingkutlad: Synjuk Waheh Chnong Jowai

Syllad | The Rising MeghalayaApril 13, 2022

Ka jingkiew ïinglieh ïingsaw jong ka Synjuk ki Waheh Chnong Jowai kadei ka jingkutlad hadien ba phiel ka Jowai Municipal Board (JMB) bad ka Jaintia Hills Autonomous District Council (JHADC) ban pynlum pynlang ïaki ñiut kiba la lum thup ha Iawmusiang, Iawthymme Ladthadlaboh, Lad Thomas Jones bad kiwei kiwei, la ong ki nongialam ka Synjuk Waheh Chnong, Jowai.

“Ngim banse ban ujor da ka mukotduma Public Interest Litigation (PIL) hadien ba ki ñiut kila sah kut naduh u bnai Rymphang 4 tarik kaba la i saitmet ban peit bad kaba la wanrah iaka sma ka tung,” la ong u Ma Alan Niangti president ka synjuk haba kren bad ki nongthoh khubor haka sngi Balang. U ma Alan u la pynpaw ba nakaliang ak synjuk kala ai khublei ïaka ïingbishar Meghalaya High Court kaba la pdiang ia kane ka PIL bad pynmih iaka hukum ban bthah ïaka Jowai Municipal Board bad ka Jaintia Hills Autonomous District Council (JHADC) ban kit noh mardor ïa u ñiut u ñier uba la shu ieh sah ha ki bun tylli ki jaka ha ka nangbah Jowai bad ban bret ha ki jaka ba dei ban bret katkum ki kyndon jong ka aiñ.

Ula ïathuh ruh ba na la liang ka synjuk na ka por sha ka por ka juh ong ïa u MLA ka thaiñ ban wad ki lad ki lynti katba na ka liang u myntri ka tnad pynroi sor ka sorkar Jylla u Ma Sniawbhalang Dhar ka synjuk ka la pyrshang ban ïakynduh bad u hynrei ym tip na kaei kadaw ym ïohlad ban ïakynduh.

Pule | Bthah ka ïingbishar Meghalaya High Court ban kit ïaki ñiut ba lumthup ha Jowai

U Secretary ka Synjuk, u Bah Rq. Riquoma Laloo ula kyntu ïa baroh ki nongshong shnong ban ïasnohkti lang bad ka synjuk ban wanrah ïaka jingkhuid jingsuba ha sor Jowai naduh na ïing na sem, ki lynti synkien, ki ïew ki hat bad ka shnong ka thaw khamtam ymdei ban bret pathar ïaki ñiut ki ñier sha ki rud ki kiar ka wah Myntdu kaba dei kawei ka wah kaba bsa umbam umdih ïaka nongshong shnong ka sor Jowai bad kaba ai jingkyrmen ïaki nongrep sawdong jong ka.