Ka jingjia ba triem ha Star Cement kala jia hadien ka jingiabeh thong na ka jingtynrah kali

Syllad | The Rising MeghalayaMay 19, 2025

Ka jingjia ba triem kaba la jia ha ka phyllaw jong ka kompeni Star Cement ha Lumshnong kaba la lam sha ka jingshah thang jong ki 15 tylli ki trok ha ka janmiet jong ka 18 tarik Jymmang ka la wan jia tang na ka daw ka jingjia iatyngkhuh kali kaba la lam sha ka jingiabeh thong.

U Additional Superintendent of Police ka District u pyntip ba ha katei ka janmiet sngi U Blei ki pulit ki la ioh jingtip halor ka jingjia shah iuh kali kaba la jia hapoh ka phyllaw jong ka Star Cement, ha kaba uwei u trai shnong u la iap hashen bad kaba la lam sha ka jingkhih bitar jong ki paidbah nongshong shnong.

Kumta mardor ki bor pulit na Lumshnong Police Station ki la wan poi ha katei ka jaka ha kaba la phah shuh shuh ia ki bor pulit.

Ki bor pulit kiba la pynlong ia ka jingtohkit bniah hadien ba ki la wan poi ha kane ka jaka ki la ioh jingtip ba ha katei ka janmiet ka la don ka jingjia aksiden kali hapdeng ka trok jong ka Star Cement bad kawei ka kali Pickup ha ka surok bah NH-6 hajan ka shnong Wahiajer.

La iathuh ba kane ka trok ka Star Cement ba la niah da u trai shnong ka la phet krad na kane ka jaka hadien ka jingjia kaba la pynlong ia u nongniah jong ka Pick up lem bad kiwei pat ba kin beh thong ia kane ka trok shaduh phyllaw jong ka Star Cement.

Hadien ba la wan poi ha kane ka jaka u nongniah ka Pick up uba dei ruh u trai shnong u la kiew ha katei ka trok jong ka Star Cement bad ktah kti ia u nongniah, bad ha ka jingpyrshang ban phet krad bad ban niah shakhmat kane ka trok ka la ioh iuh ia une u nongniah ka Pick up uba la khlad noh hashen.

Tang hadien khyndiat por kumba 300 ngut ki briew kiba dei na ki shnong ba marjan kiba rah da ki tiar pynmynsaw kynthup ia ki dieng ki maw ki la ialum lang hapoh ka phyllaw jong ka Star Cement bad sdang ban pynjulor ia ka jaka ap pahara, ki kor CCCTV bad thombor ia u nongap pahara.  

Kine ki paidbah kiba don hapdeng ka jingbitar ki la khang lynti ruh ban pynkynriah ia ka metiap jong utei u lanot hadien ba la lah ban pynkynriah noh ia u shapoh Civil Hospital, Khliehriat. 

Kine ki paidbhur tang hadien katto katne por ki la thang noh ia kumba 15 tylli ki trok kiba pynieng bad ha kiwei pat ki bynta jong ka Star Cement. Hadien kane la phah mardor ia ka kali pynlip ding, hynrei u paidbhur u la thombor ia ki dkhot pynlip ding jong ka Star Cement bad pyrshang ruh ban pynjulor ia ka kali pynlip ding.

Na ka liang ki bor pulit ki la pyrshang ban pynsnangeh ia u paidbhur uba thmu ban thang ia kane ka kali pynlip ding bad thombor ia ki nongap pahara, hynrei u paidbhur u la sdang ban ktahkti sa ia ki bor pulit kiba pyrshang ban tehlakam ia ka jinglong jingman bad ban aijingiada ia ki mynsiem briew bad ki jingdon jingem.

Hynrei da ka jingwan poi shuh shuh ki bor pulit la lah ban tehlakam ia ka jinglong jingman bad ban pynpra ia u paidbah kumjuh ban pynlip ia ka ding kaba klang.

Hadien kane ka jingjia la phah shuh shuh ia ki bor pulit sha kane ka jaka khnang ban khanglad na ka jingiakynad kaba lah ban nangpur shuh shuh.

Halor kane ka jingjia na ka liang ki pulit ki la register case bad ka jingtohkit ka la iaid shakhmat.