Ka jingiadei jingieit ba rieh ka Sonam ha lyndet ka jingshah pyniap u kurim jong ka u Raja

Syllad | The Rising MeghalayaJune 9, 2025

Ki pulit ka Jylla ki la pynpaw ba ka daw ba kongsan ha lyndet ka jingshah pyniap ba dang shen jong u tourist na Indore u Raja Raghuvanshi ka lah ban dei na ka jingiadei jingieit ba rieh ka kurim jong u, ka Sonam bad u Raj Kushwaha uba la shah kem noh ha ryngkat laingut kiwei pat na Madhya Pradesh.

“Ka jingtohkit mynta hi ka kdew ba ka don ka jingiadei jingieit ba rieh halor kane ka jingjia shah pyniap, kata ka jingiadei ba rieh hapdeng u Raj Khuswaha bad ka Sonam. Ynda ki la wan poi sha kane ka jylla yn sa lah ban pynthikna, hynrei ia mynta hi ngam pat lah ban ong ia ka daw, hynrei ka kdew sha ka jingiadei jingieit,” ong u SP ka East Khasi Hills u Bah Vivek Syiem haba kren sha ki lad pathai khubor haka sngi Nyngkong.

U la pyntip ruh ki la don baroh haduh sawngut ki suba donkti kiba la shah kem noh halor kane ka jingjia ia kiba la tip kyrteng kum u Khuswaha (21), Akash Rajput (19) na Lalitpur, u Vishal Singh Chauhan (22) bad u Anand Kuli (23 snem rta) ia kiba la wanlam hakhmat ka iingkashari. 

“Ka kynhun jong ngi ka la hiar sha Uttar Pradesh ban kem ia ka Sonam kaba la leit pyndem noh ialade ha Nandganj police station ha Ghazipur district. Ki ar kynhun ki la hiar sha katei ka jylla ha ka 8 tarik Jylliew bad ia ka jingkhynra la pynlong ha katei hi ka sngi ha ryngkat ki pulit ka UP bad MP, katba ka kynhun kaba lai ka la don ha ka lynti ban leit kem ia ka Sonam,” ong u Bah Vivek da kaba bynrap ba ki pulit ka jylla ka la kyrpad ban pynkynriah ia baroh kine kiba la shah kynnoh donkti sha Shillong na ka bynta ban pynlong shuh shuh ia ka jingtohkit halor kane ka jingjia.”

Une u heh pulit u la pynthikna ba u Khuswala um shym la don ha Shillong, hynrei u dei ma u uba la bthah ia kitei ki laingut ia kiba u tourist guide u la pynpaw ba u la iohi ia ki bad kitei ki shijur ha ka sngi ba kin sa jah rngai noh na ka thain Sohra na ka bynta ban pyniap ia u Raja.

U Raja bad ka Sonam ki la jah rngai naduh ka 23 tarik u Jymmang ba la dep ha ka jingwan shangkai sngewbha sha Sohra ha kaba hadien la lapdien ia ka metiap jong u Raja na ka jaka riat hajan ka kshaid Weisawdong.

U SP u pyntip ruh ba katkum ka autopsy report napoh North Eastern Indira Gandhi Regional Institute of Health and Medical Sciences (NEIGRIHMS) la kdew ba ki don artylli ki dak mong na ki bynta ka khlieh jong utei u lanot, kawei na shadien bad kawei nakhmat.

Haba kylli, u SP u la ong ba ka jingkem la pynlong halor ka nongrim jong ki sakhi satar.Ia mynta hi ngi lah ban ong ba ka SIT tang hapoh hynniew sngi ka la lap ia ki sakhi satar kiba lam sha ka jingshah kem jong kine ki suba donkti.

“Ka SIT kam shym la leit sha katei ka jaka ban kem thurmur ia ki suba, hynrei ka la leit ha ryngkat ki sakhi satar kiba biang bad tip ba ki runar ki don ha katei ka jaka.Hadien ka jingtohkit bniah ki la leit sha katei ka jaka da ka jingiarap da ki bor pulit jong kitei ki jylla, bad ngi la ioh ban kem ia ki,” u la bynrap.

Haba pynpaw ba ka jingwad ia kitei ki shikurim kiba jah rngai ka dei ka kam kaba pynshem jingeh shibun, u Bah Vivek u la ong, “Naduh ka khyllipmat ba ki la jah rngai noh ka jingther u ‘lapbah ka la sdang bad bad ki jaka riat kiba ngi la hap ban ngam kim long kiba suk. Ban pynkut noh ngi donkam ia ki jingbuh jingbuh rekod kiba khlain, ki CCTV namar ngim don ia kiba kum kita, kumta kane ka la buh jingeh shibun.