Ka jingduna um ha pung Umiam kam don jingiadei bad ka jingmaramot ia ka dam: Mondal

Syllad | The Rising MeghalayaMay 16, 2025

U Myntri ka Tnad Bording u AT Mondal u la ong ba ka jingduna um ha ka pung Umiam kam don jingiadei ei ei ruh bad ka jingmaramot ia ka dam. 

Haba kren sha ki lad pathai khubor haka 15 tarik Jymmang, u Mondal u la iathuh ba kiba bun ki briew ki la phone sha u ban pynpaw ia ka jingsngewkhia halor ka jinghiar jong ka um hapoh ka pung Umiam da kaba kynnoh ba ka lah ban dei namar ka jingmaramot ia ka dam.

Hynrei, na ka liang u Myntri u la kyntait ia kane da kaba ong kam don satia kano kano ka jingiadei bad ka jingmaramot ia ka dam. “Ka um ka la hiar ha katei ka kyrdan ne level namar ngi la buh ia ka por ban pynmih ia ka bording,” u la pynshai.

“Kumba ngi la kular ba kan ym don ka jingpynlip bording ne load shedding ha ka por ba ka mariang ka rang tyrkhong khamtam ha ka por eksam, ngi la pynlang ia ka um ha katei ka jaka bad ngim shym la pynmih palat ia ka bording na Umiam namar ngi la pynmih bording na kiwei kiwei pat ki tyllong. Mynta ka jingdon um ka la hiar hynrei kam mut ba ka don ka jinglait jong ka um. Hynrei ka dei namar ngi la sdang ban pynmih bording namar kam don jingmut ban shu buh ia ka um ha kane ka por namar ka aiom slap ka la wan,” ong u Myntri.