Ka Jalaphet Moochut Pyrdung ka lahduh haka First Division Football Tournament ka Saipung Block

Syllad | The Rising MeghalayaDecember 12, 2023

Ka shikol kaba la thep da u Thomas Dkhar kaba wan haka extra time kala biang pura iaka Jalaphet Moochut Pyrdung SC ban rah iaka nam lahduh haka First Division Football Tournament kaba pyniaid da ka Saipung Block Sports Association (SBSA) mynta ka aiom ialehkai. Kane kala wan hadien ba ka Jalaphet Moochut Pyrdung kala pynliem da 1-0 iaka Mulait Bri Sumer SC haka jingiakhun phainal kaba la long ha madan Lamyrsiang haka 12 tarik Nohprah.

Ka jingialehkai haka por kaba la buh kala wai khlem don mano mano ba ioh thep kol, dei hadien bala rah iaka jingialehkai sha ka extra time la lah ban rai iaka namjop. Ia kane ka kol u Thomas Dkhar ula thep haka minit kaba 114.

La sam iaki khusnam sha baroh ar kynhun da u kongsan u Ma Aron Bamon uwei na ki riew pawkhmat ka thain haka jingdonlang u President ka SBSA u Ma Victor Suja, u Ma Rimi Shadap General Secretary bad kiwei kiwei ki dkhot ka SBSA.

Ka lahduh jong kane ka lympung ka la ioh ban khur iaka khusnam pisa ba T.15 hajar tyngka ryngkat ka trophy, katba ka kynhun kaba wan ba ar ka la ioh pdiang iaka khusnam pisa ba T.10 hajar tyngka ryngkat ka trophy.

Ka khusnam ‘Player of the Match’ ba la ioh da u Kinison Chyrmang jong ka Mulait Bri Sumer SC, ka nam ‘Best Goalkeeper of the Tournament’ ba la ioh da u Kos Dkhar jong ka Mulait Bri Sumer, ka nam ‘Top scrorer’ la ioh rah da u Rahul Bareh bad ‘Player of the Tournament’ la ioh da u Ripil Chyrmang jong ka Jalaphet Moochut Pyrdung SC.

Ha kawei pat ka khubor, ka jingiakhun Final jong ka lympung ialehkai Super Division Football League kan long haka 18 tarik Nohprah hapdeng ka Mulait United FC pyrshah iaka Lamyrsiang SCC haka por 12:30 shiteng sngi.