Ka jaka ba kynnoh ban tei University ka Assam ka hap hapoh u pud ka Jylla ong u ma Sniawbhalang Dhar

Syllad | The Rising MeghalayaJune 9, 2021

U Ma Sniawbhalang Dhar, Myntri Sorkar Jylla ba dei khmih iaka tnad Transport bad kiwei ula ong ka jaka kaba la kynnoh ban tei university ka Assam ka dei ka jaka kaba pyndonkam u paidbah ka shnong Khanduli bad kane ka jaka ka hap hapoh u pud u sam ka Jylla.

“Nga la wan jurip dalade ha kane ka jaka hadien bala nga la ioh jingtip na ki nongialam shnong ka Khanduli halor ka jingwan sorjamin jaka ki nongmihkhmat ka Assam ban tei iaka university haka jaka jong ngi,” la ong u ma Sniawbhalang haka jingjurip ia ka jaka ha Khanduli haka sngi ba Ar.

U Ma Sniawbhalang Dhar uba long ruh u MLA ka thain Nartiang ula ong “Nga sngewkhia halor kane ka kam namar ba u MLA ka Karbi Anglong uba la pynbna ban tei ia ka University. Ngan rah ia kane sha ka sorkar ban iakren ban khanglad bad ban pynpaw ruh iaka jingpyrshah halor kane ka jingthmu ka Assam.”

Ha kane ka jinghiar jurip u ma Sniawbhalang la iadonlang ka Border Magistrate ka B Blah, Dy SP Headquarter u MJ Marngar, u MDC Jesse Suiam nalor u waheh shnong Khanduli Yoshida Nongspung bad kiwei kiwei.

Kumban shu iathuh, u MLA jong ka Baithalangso u Rupsing Teron lem bad kiwei de ki dkhot jong ka Karbi Anglong Autonomous Council (KAAC) ki la leit hiar sha ka shnong Khanduli haka 30 tarik Jymmang ban sorbe jaka ban tei skul bah.

Kane kala pynkyndit iaka shnong Khanduli bad kila buh ruh iaka jingujor sha ka bor synshar district halor kane.