Ka ishu lynti rel ka la kut hadien ba pynphai ka Sorkar ia ka song pisa: Dr Kharlukhi

Syllad | The Rising MeghalayaApril 16, 2025

U President barim ka NPP uba dei ruh u MP ka Rajya Sabha, u Dr WR Kharlukhi haka 15 tarik Iaiong u la ong ba ka ishu ne ka mat kaba iadei bad ka lynti rel ha ka jingshisha ka la kut noh namar ka Sorkar Jylla ka la pynphai noh ia ka song pisa kaba T.200 klur kaba la mang da ka Sorkar Pdeng na ka bynta ka jingshim jaka ban pyntreikam ia ka project lynti rel ha ka jylla.

“Ka Sorkar Jylla ka la pynphai noh ia ka pisa, kumta ka sobjek ka la kut tang hangta,” ong u Dr Kharlukhi haba kren sha ki lad pathai khubor haba pynpaw halor ka rai jong ka sorkar ban thaw ia ka All Party Committee ban iakren ia ki kam ba iadei bad ka jingpyniasoh lynti rel hapoh Rilum Khasi bad Jaintia.

“Mynta ka sorkar ka la pynphai noh ia ka pisa bad kumta nangno kin ioh biang ia ka pisa?” u la buh jingkylli.

Katkum ka jingong jong u, ka jingtyrwa ban pynlong ia ka jingialang iamir jingmut ka lah ban long na ka bynta ban wanrah ia ki project lynti rel ha ki por ki ban dang wan.

Halor ka rai jong ka seng Voice of the People Party (VPP) ban ym wan iashim bynta ha kane ka All Party Committee ban iakren halor ka lynti rel, une u nongialam ka NPP u la ong, “Kaei kaba ka sorkar ka donkam ka long ka jingpyrshah kaba tei. Ngam tip da kaba ngam don ha kata ka Committee iamir jingmut la ka long kaba tei ne kaba pynjot ngam tip,” u la bynrap.