Ka ‘International Tourism Mart’ ba lai sngi kynthih yn pynlong ha ka nongbah Shillong

Syllad | The Rising MeghalayaOctober 13, 2023

Ka Meghalaya ha ka sien kaba nyngkong kan pynlong ia ka “International Tourism Mart (ITM)” ka ban long naduh ka 21 haduh ka 23 tarik u Naiwieng u ban wan ha ka nongbah Shillong, pynbna u Myntri ka Tnat Tourism u Bah Paul Lyngdoh haka sngi Palei.

Ia kane ka ITM yn wan plie da u Myntri ka Tnat Tourism ka sorkar pdeng u GK Reddy ha kaba yn wan iashim bynta lang da baroh ki jylla jong ka thain shatei lammihngi (Northeast).

U Bah Paul u la ong ruh ba ha kane ka iew ban wan iashim bynta ruh na kylleng ki ri ka pyrthei yn iohlad ban pyni nam ia ki jingdro bad ki jingthaiñ bad ki jingshna kti bapher bapher, Tour Operator, Hoteliers, ki nongpyniaid ia ki Homestay bad ki jaka jngohkai. Na ka liang ka Tnat Tourism kan ioh ruh ia ka lad ban pynpaw ia ka Meghalaya kum ka jaka kaba khring ia ki nongwan jngohkai ha ka rynsan jong ki ri ka pyrthei.

Nalor kata u la ong ruh ba ha kane ka tamasa ka dei ruh kaba kongsan namar ka dei ka sien kaba nyngkong eh ba ka nongbah Shillong kan khot pynlong ia ka International Tourism Mart, kata ia kaba yn pynlong ha Lairiti Centre kaba don ha New Shillong Township khnang ba kan ym wanrah ia ka jingsahkut kali ha ka nongbah Shillong.