Ka ILP kam dei ban khanglad ia ka jingwan ki tourist sha Meghalaya; ong u Myntri

Syllad | The Rising MeghalayaJune 10, 2025

U Myntri ka Tnad pule puthi ka Jylla u Rakkam A Sangma haka sngi ba Ar u la ong ba ka Inner Line Permit (ILP) lada pyntreikam ha Meghalaya kam dei satia ban ktah ia ka jingwan jong ki nongshangkai pyrthei (tourist) sha kane ka jylla.

“Ka long kaba biang bad kaba bha shibun lada lah ban pyntreikam ia ka ILP khnang ba ngin lah ban tehlakam kham bha ia ka rung ka mih jong ki briew kiba na bar. Hynrei, la ka dei ka ILP ne kino kino ki lad jingiada kim dei satia ban khanglad ia ka jingwan jong ki nongshangkai ba kin wan sha kane ka jylla namar ba ki tourist ki long kum ka lad kamai kajih na ka bynta ka jylla,” ong u Rakkam haba kren sha ki lad pathai khubor.

Da kaba pynpaw ba ka kam jngohkai pyrthei ka dei ka bor jong ka ioh ka kot jong ka jylla Meghalaya, u Myntri u la ong, ” Namar kata, ka kam jngohkai ka dei ban kiew bad ka dei ban pynmyntoi ia ki nongshong shnong kiba ioh kamai na kane. Kumta to ngin iatreilang khnang ba ka kam jngohkai pyrthei jong ngi kan kiew shaphrang.”

Haba pynpaw ka jingsngewkhia halor ka mat kaba iadei bad ki kam wan buhai shnong beain, u Rakkam u la ong ba ka jylla ka donkam ia ka ILP ban tehlakam ia ka jingwan rung kyrthep ki briew kiba na bar bad ka jingwan buhai shnong beain da ki briew kiba na shabar ka jylla.

Katba ka Meghalaya ka dang ap ia ka jingmynjur jong ka Sorkar Pdeng na ka bynta ka ILP, u Myntri u la ong ba ka jylla ka la don lypa ia ki lad jingiada kum ka Sixth Schedule, Land Transfer Act bad ka ban Meghalaya Residents Safety and Security Act (MRSSA), 2016 ban weng ia ka jingeh kaba iadei bad ka jingwan buhai shnong beain da ki briew kiba na bar.

“Ngi dei kiba la pynkup bor. Ngi don ia ki Dorbar Shnong, ngi don ia ki Nokma ha man la ki shnong bad ngi la pynkhreh bha ban lap la ki don ne em kiba wan shong wan sah beain. Hynrei kane kan treikam ryntih tad lada baroh ki shim ia ka jingkitkhlieh. Lada ki Dorbar Shnong, lada man la ki Nokma kin bishar bniah bad ban lapdien ia ki nongwan buhai shnong beain kiba wan namar namar ki jaka ki dei ki jong ngi, ki jaka ki dei jong ki nongshong shnong, kumta kam mut ba ngi lah ban thied khyndew bad ban shong ban sah hangne. Ngi don ia ki District Council bad bad donkam ruh ia ki NOC na ki District Council, kumta ngam tharai ba ka long kaba suk ia ki (briew kiba na bar) ba kin shu wan bad shong shnong ha Meghalaya,” u la bynrap.