Ka Dorbar Kur ka Kur Phawa Siangshai kan long haka shnong Mutong East Jaintia Hills

Syllad | The Rising MeghalayaJanuary 24, 2024

Ka Executive Committee jong ka Kur Phawa-Siangshai kala pyntip paidbah ba ka dorbar kur kaba phra jong ka kur Phawa Siangshai kan long haka 27 tarik Kyllalyngkot haka shnong Mutong, East Jaintia Hills.

Ha u kyrwoh ka Executive Committee jong ka Kur Phawa-Siangshai, seng kmie kala pynpaw iaka jingsngewkmen shikatdei eh ban pyntip sha phi baroh ki para kur para jait, naduh ki Chairman, ki Secretary bad ki nongkitkam jong ka Kur ha ki shnong ki thaw bad ki unit bapher bapher, bad ia phi ruh ki para kur Lyngdoh Phawa, ki kur sin jong ka kur Phawa bad Siangshai, ba kan don ka Dorbar Kur – 8, ha ka 27-01-2024, haka por 10:00AM, ha ka shnong Mutong, East Jaiñtia Hills District, kumba ju long man la u snem. Kumta, ka seng kmie ka kur Phawa- Siangshai  ka khot ka wer sngewbha ia phi ban wan khnang khnang sha kane ka jingialang kaba ha khlieh duh jong ka Kur, ha kaba phin ioh sngew bad tip ia ki kam bad ki jingthmu jong ka Kur Phawa-Siangshai Seng Kmie (Central Body).

Ka seng kur ka khot wer khamtam eh ia  ki longkmie, ba phi shim khia ban wan ialam ryngkat ia la ki khun ki kti, ki khun samla kiba la pule ha skul ne kolej ne ha ki skul bah, ba kin dup long kiba shlur ban wan sha khmat ha ki kam jong ka Kur, bad ba kin long ki briew kiba tip kur tip jait, kiba tip briew tip Blei bad ruh kan iarap ia ki ban ia ithuh i thaw iwei ia iwei pat haka jingiaidlynti ka jong ki, kin tip ruh ia ki para kur kham tang ha ki shnong ki thaw la jong, hynrei, sha kiwei pat ki shnong ki jaka kiba don ki para kur ki jong ngi.

Ha kane ka Dorbar Kur, yn sa ai khusnam ia ki khun samla jong ka Kur kiba wan sha khmat eh ha ka jingpule ka jong ki bad ruh yn sa pynkup burom ia ki riew tymmen jong  ka  Kur. Kin don bun ki jingrwai jingshad na ki sap ki phong jong ki para kur jong ngi ki ban pynsngewtynnad ia ngi.