Ka Congress ka don hapoh ICU: Sniawbhalang Dhar

Syllad | The Rising MeghalayaFebruary 1, 2023

U ma Sniawbhalang Dhar u kyrtong ka NPP na 1 Nartiang Constituency ula ong ba ka Congress ka don hapoh ICU bym tip lano ka sngi kan iap.

“Ka jingialeh election mynta ka kynti na Nartiang Constituency ka dei hapdeng ka Congress bad NPP ha 1-Nartiang Constituency, hynrei ka seng Congress kalong pat thik kum ka kali bym don shaka (tyre) kaba sah satang ka engine,” la ong u Ma Sniawbhalang haba kren haka jingialang ialap election ban kyrpad ia u paidbah ban jied biang ia u kum u MLA ka Nartiang haka shnong Pdeiniadaw haka sngi ba Ar.

Ha kane ka juh ka sngi u ma Sniawbhalang ula pynlong jingialang ha Mynsngat bad Lapangap ka shnong kaba hap ha khappud Assam Meghalaya.

U Ma Sniawbhalang Dhar uba long kum u MLA la lai samoi, u sngewskhem ba un jop biang mynta ka kynti wat la kane ka thain ka don haduh lai saw ngut ki kyrtong kynthup iaka UDP bad kiwei kiwei nalor ka Congress.

Haba kren shuh shuh ha kane ka jingialang ula ong ba lada u shah jied biang kum u MLA u angnud ban pynlong iaka shnong Pdeiniadaw kum ka model village ha katei ka thain. Ula ong ba ruh ba ka jingsahdien ka shnong Pdeiniadaw ka dei ka jingleh hi ki nongialam shnong namar kim ju wan iakynduh ia u bad kam dei ka jingleh jong u.

“Nga dei u briew uba pyni da ka kam ymtang ka ktien, ngam ju kular klumar hynrei kaei kaba nga kular nga pyndep kata kadei ka jinglong jong nga haki 15 tylli ki snem ba nga long kum u nongmihkhmat”, la ong u Ma Sniawbhalang.

Ula kyntu ïaki nongshong shnong ka Pdeiñïadaw ban klet noh ki san snem bala dep bad ban ïatreilang nangne shakhmat khnang ban phuh ban phieng ka shnong ka thaw katkum ka jingangnud jong ki nongshong shnong.

Haba pynksan ïaka seng NPP, u Sñiawbhalang ula ong ba ha kane ka elekshon ka NPP kan thaw sorkar marwei ha Jylla mynta ka samoi. Dei tang ka NPP ka ban ïoh iaka jingjop kaba bun na rilum Garo bad Khasi Jaintia, la ong ma Sniawbhalang.

Kiwei kiwei kiba la ai jingkren ki long u CEM ka JHADC u  Ma Thombor Shiwat, u MDC ka JHADC u Jesse Suïam, u MDC barim ka Myngsngat Khanduli u Pheiñ Nangleiñ nalor kiwei kiwei.