Ka CM Connect ka rynsan ba ki nongshong shnong kin buh jingkylli bad ka sorkar kan jubab

Syllad | The Rising MeghalayaFebruary 16, 2024

U Chief Minister Conrad K. Sangma haka 15 tarik Rymphang ula plie paidbah iaka rynsan “CM-CONNECT” ka ban ai lad iaki nongshong shnong ban iakren bad ka sorka. Lyngba kane ka rynsan, ki nongshong shnong ki lah ban phone ha une u number Helpline No. 1971 ban pynsngew iaka jingeh jong ki.

“Kane ka rynsan kan plie lad iaki nongshong shnong ban iakren bad ka sorkar ban buh jingkylli bad ka sorkar kan sngap bad kan jubab ban pynjem iaka jingeh,” la ong Conrad haba plie ia kane ka prokram ha Convention Centre of North Eastern Hill University (NEHU), Shillong campus.

Ka sorkar kala buh iaki ophisar na ki tnad bapher bapher ban kin iakren bad jubab iaka jingkylli u paidbah bad ki nongshong shnong lyngba kane ka rynsan iakren bad ka sorkar lyngba ka social media channels kynthup iaka WhatsApp. Kane ka number 1971 kan treikam naduh 8 AM haduh 8 PM, ha ki san tylli ki ktien kynthup iaka Khasi, Garo bad Jaintia.

Ha kane ka juh ka sngi u CM ula pyllait paidbah ruh iaka prorkam bapher bapher kiba kynthup iaka MegARISE, Meghalaya State Organic Mission 2.0, bad pyllait ruh iaka pisa hapoh ka Green Meghalaya bad FOCUS. Ula pyllait paidbah ruh iaka grassroot projects kaban pynkup bor bad peit iaka bha ka miat ki nongrep haka rep ka riang bad kane ka projek ka mang ruh na ka bynta ban ai jingiada iaki khlaw ki btap kaba la kot T 400 klur.

MegARISE ka dei kawei pat ka projek ban iada iaki tyllong um ne ki wahduid kiab don haka jingma kaba dei kawei na projek ban pyniaid shakhmat iaka State Water Policy. Kane ka projek la mang ban pyntreikam haka jinglut kaba T.344 klur.

Ka Meghalaya State Organic Mission 2.0 ka buh iaka thong ban pynkylla iaka 100,000 hectares ka jaka sha ka jingrep kaba khlem khleh dawai sboh ne organic. Ia kane ka organic mission la kyrshan ruh na ka KFW project kaba na German ban kyntiew iaka jingiohnong ki nongrep bad ban pynbun iaka jingmih bad ban pynioh iaki mar rep haka dor kaba bit eh bad ban pynbha shuh shuh iai mar ki mata.

Ha kane ka sngi u CM plie ruh iaki 12 jaka sain jingbam bad 3 tylli ki jaka pynpjah ne ki cold storages ha jylla hapoh ka shatri jong ka Meghalaya NEXT.