Ka Assam Rifles Umphyrnai Presbyterian SS bad ki thei ialehkai ka Iewrynghep ki lahduh ka Subroto Cup na EKH

Syllad | The Rising MeghalayaJuly 1, 2023

Ka Assam Rifles Public School, ka Umphyrnai Presbyterian Secondary School bad ki thei ialehkai ka Iewrynghep Secondary School ki dei ki lahduh ka District Level Subroto Mukherjee Cup kaba pyniaid da ka ophis u District Sports Officer, East Khasi Hills District.

Kane kala wan hadien ba kine ki skul kila jop iaka final haka sngi Saitjain kaba long ha madan jong ka MFA Turf Third Ground, Polo.

Haba phai sha ka U-17 ki khynnah kynthei, ki thei ialehkai ka Iewrynghep Secondary School, ki la lah ban pynliem noh ia ka H. Elias Memorial Higher Secondary School da  2-1.

Ia kine ki ar kol ka Iewrynghep Secondary School, la thep ia ki da ka Ibalari Nongrum ha ka minit kaba 20 bad ka Iaraplang Nongrum ha ka minit kaba  43, katba ia ka shi kol jong ka H.Elias Memorial HSS la thep ia ka ha ka minit kaba 50 da ka Ridalin Suting.

Haka U-14 jong ki khynnah shynrang, ki khynnah skul ka Umphyrnai Presbyterian Secondary School, ki la lah ban pynliem noh iua ka Assam Rifles Public School lyngba ka tie breaker kaba long da 4-2.

Katba ha ka U-17 ki khynnah shynrang jong ka Assam Rifles Public School, ki la lah ban pynliem noh ia ka H. Elias Memorial Higher Secondary School lyngba ka tie breaker kaba long da 4-1.

U kongsan ha kane ka sngi u dei u Ailad Kynta uwei na ki rang ialehkai Phutbol bna nam bha ka jylla, ha kaba la don lang ruh u DSO EKHD u bah O.Mawthoh, ki Principal bad Headmaster jong ki skul bad ba na sharud ka madan la wan ban sakhi bad ai mynsiem da ki khuynnah jong ki skul ba la iakhun ia ka phainal.

Da kane ka jingjop, kine ki lai tylli ki skul kin khreh ban mihkhmat ia ka District ha ka State Level ia kaba yn sa pynlong ia ka mynta hi u bnai da ka tnat Directorate of Sports & Youth Affairs.