Jurip u MLA Jowai ia ka madan Jrisalein, bthah ia ka PWD ban pynkhreh ia ka estimate

Syllad | The Rising MeghalayaAugust 28, 2025

U MLA ka Jowai u Bah Wailadmiki Shylla ha ka 27 tarik Nailar u la khot pynlong ia ka jingialang bad ka ophis Jowai Municipal Board (JMB) halor ka jingthmu ban pynbha ia ka madan Jrisaleiñ ha Chutwakhu.

Ha kane ka jingialang la wan iashim bynta lang da ki nongialam ka shnong Chutwakhu, ki nongialam na ka Kur Challam, ki ophisar sorkar ka District bad ki nongmihkhmat na ka Government Boys’ Higher Secondary School, Jowai.

Ha ka jingialang u MLA u la pynpaw ia ka jingkut jingmut ban kyntiew kyrdan ia kane ka madan da kaba shna bha ia ki jaka shong paidbah ne gallery, ki kynroh bad kiwei pat ki jingdonkam khnang ba kan long kaba bit ba biang pura.

Hadien ka jingialang, u MLA u la jurip ruh ia kane ka madan ha ka jingsynran ka Kong DV Lyngdoh MCS, Waheh Shnong Chutwakhu u Bah Philanderwell Lyngdoh, ki nongialam ka Kur Challam bad ki ophisar na ka Tnad PWD.

Haba kren sha ki lad pathai khubor, u Bah Wailadmiki u la pynpaw ba ka jingthmu ban kyntiew kyrdan ia kane ka madan ialehkai ka dei kaba la iaid mynta lah kumba katto katne por, da kaba phaikhmat kyrpang namar ka jingdon hapdeng jong ka sor Jowai bad namar la rakhe ia ki sngi kiba kongsan kum ka Independence Day bad Republic Day ha kane ka madan bad kiwei kiwei ki prokram paidbah.

U MLA u la ai ruh ka jingiaroh ia baroh kiba don bynta bad kiba iasam lang ia ka jingiohi halor ka jingdonkam ban kyntiew bad pynbha ia kane ka jaka na ka bynta ka jingbit jingbiang jong ki paidbah.

Ban pyniaid shakhmat ia kane ka project, u MLA u la bthah ia ka Tnad PWD ba kan pynkhreh noh kham kloi ia ka estimate, katba ka Kur Challam bad ka skul Government Boys’ HSS la bynshet ban aiti ia ki jingtip kiba donkam sha ki bor ba dei peit khnang ban lah ban sdang noh ka jingpynbha bad pynitynnad ia kane ka madan bad ki sawdong jong ka.